「吓？乜你係自由黨㗎？」我仲代表過自由黨參選添，不過都廿幾年前嘅事。
今日嘅自由黨，就梗係笑話。但廿幾年前，自由黨不但係一個大黨，而且都係商界同專業人士精英組成。作為一個剛剛大學畢業嘅後生仔，又無乜家底，想認識香港社會嘅另一個階層，入自由黨好正常喎。
我畢業第一份工，就係田北俊嘅助理。之後就轉咗去做夏佳理嘅助理。1999 年試過掛自由黨嘅身份參選；好在輸咗。
之後，離開過；2010 年左右，我甚至拉咗一班人，離開當時嘅自由黨 😂 。
2012 年周梁淑怡約我食飯，又搵返我去幫手；幫手嘅意思係做義工。我好坦白咁講：「有美國居留權，唔參得選，幫下手就無問題。」
其實我都諗咗三幾日，究竟好唔好寫呢篇。畢竟入面嘅人，好多都仍然活躍政壇。但我想講嘅事，其實都係歷史嘅一部份，我相信大家都唔會介意。
如果大家想睇秘聞，我無乜可以出賣。以下都只不過係過來人嘅親身經歷，白頭宮女話當年⋯⋯
01，1997 年，我剛剛大學畢業，盲中中咁買份報紙，睇招騁廣告，然後寄信去應徵。有份工話請議員助理，咪試吓囉。再加上我畢業前個暑假，剛剛去咗加拿大國會做intern ，主要做嘅就係選舉。
02，響美國，大學畢業後做議助，好正常；香港呢，就嘛嘛。依家睇返，當時來講我都係呢行裡面算係明日之星。1
03，見工嘅時候，都唔知原來請人嘅係田北俊（下稱：田生）。當然，田生秒秒鐘幾百萬上落（是真的），又點會得閒見我？就連當時佢有另一個助理，都唔得閒見我。反而係搵咗當時自由黨個研究總監。
04，就係咁，我就做咗田生嘅助理。另一個助理處理立法會，而我呢，就只係做選舉。但問題係，個屆選舉，田生好快就自動當選。咁點算呢？佢就叫我：「你去睇下自由黨有邊個需要幫手，就去喇。」
05，本來，田生係想我幫其他功能組別嘅，例如何承天。點知，自由黨嘅功能組別當時真係太強，根本無人需要我幫手。結果我走咗去幫港島出選嘅黃英琦（下稱：Ada）。
06，Ada 好熱血，又有啲大小姐脾氣，但我嘛，理論上係義工，咁大家都客客氣氣。又唔怕講埋，田生同 Ada 好多事睇法都有啲唔同。田生保守少少，Ada 就新派啲。但田生一開始就話由得我去揀，所以我去幫 Ada 佢亦無話唔畀 ；雖然我知佢唔鍾意。
07，幫 Ada 選嘅時候，好好玩；識咗一班好後生嘅「義工」。其實都有出返啲車馬費嘅，但大家都真係覺得選舉陣地戰好好玩。如是者，過咗一個好開心嘅夏天。
08，個次選舉，自由黨功能組別就贏晒，但輪咗直選。Ada 輸就完全唔出奇，但我好記得點票當晚，李鵬飛（下稱：飛哥）輪咗，大家多少都有啲意外。飛哥非常君子，輸，咪輸囉；選舉唔係贏就輸，怕輸就唔好選。飛哥將主席一職交畀田生，呢個亦係後來大家所認識嘅自由黨。
09，自由黨係唔係好滿足於做功能組別第一大黨呢？唔係。當時，幫過 Ada 嘅夏佳理（下稱：Ron），問我有冇興趣去幫佢，我又一口答應。其實最主要原因係：田生間公司萬泰，當時雖然已經完全轉型成一間專做豪宅收租嘅發展商，但係始終有工業背景，所以大家都好早返工。我好多時都遲到，自己都非常之咁唔好意思。
10，Ron 完全係唔理我幾點返工，同埋我個位係旮旯，佢又成日都唔返律師樓；我記得大多數時候，都係成十點半先返到胡關李羅。做咗無耐，佢同我講，佢想 2000 年去直選。
11，各位如果記得，1999 年發生過一次對當時律政司司長梁愛詩嘅不信任動議；簡單講當時梁愛詩以公眾利益為由，向刑事檢控專員施壓，叫佢唔好告星島嘅老闆胡仙。今日睇就會覺得：「嘩，乜個陣咁就已經可以提出不信任動議？」
12，當時自由黨，其實係傾向支持呢個不信任動議。「乜西環無畀壓力咩？」當時嘅西環，又真係相對尊重一國兩制。自由黨差少少支持不信任動議嘅原因係：「法治對香港好重要；律政司向刑事檢控專員施壓，亦唔啱規矩。」各位，呢個時候嘅自由黨，真係同今日嘅無得比。
13，Ron 雖然係代表地產建造界，但其實佢真正嘅身份，係一個律師，亦係自由黨當時嘅司法事務發言人。話晒都係胡關李羅嘅 partner ，主權移交前甚至傳過話佢會做律政司。2 但呢個亦係尷尬嘅地方，因為如果佢出來話支持對梁愛詩嘅不信任動議，會畀人話佢私怨。無錯，當年嘅香港就係咁均真。
14，但最終自由黨傾過之後，好似話「傾向支持」；然後有記者問 Ron，佢又口快快話：「傾向支持」。
15，自由黨「傾向支持」，其實好大件事，因為民主派加自由黨，真係會夠票。政府好緊張，以我所知，當時董建華親自向各大地產商要求幫手，向自由黨施壓。
16，點解搵地產商呢？首先 Ron 係地產建造界；但點解一個律師，會代表地產建造界？正如劉健儀係律師，點解又代表過航運界。嗱，其實乜界都，都係地產發展商，航運喎，咪又係九倉和黃。律師係好可信嘅代言人，專業從政，就梗係搵律師。3
17，如是者，自由黨第一個話呢件事唔可以支持嘅，大家估下係邊個？呢個秘密我唔講得。但我只可以講，到投票個日，個個都知自由黨唔會支持，但唯獨係 Ron 嘅立場無人知。佢篇發言，當然亦只係得我同佢兩個人見過；佢本來發言用英文，但叫我譯做中文，費事到時畀人曲解。個晚立法會開通宵會，我就揸住疊譯本響記者室。個個都問我可唔可以先睹為快，我就梗係唔畀喇。
18，「今日香港沒有贏家。」Ron 講完呢句之後，無投票，走咗出議事廳。「喂咁即係點呀？」個個都咁問我，我咪話：「佢無投票喎。」其實，我真心覺得 Ron 好醒，理論上就邊個都無得罪。但係，結果都係有人唔滿意，覺得佢咁做太串。
19，之後，Ron 都繼續叫我去準備直選嘅事，甚至叫我去選埋一份。就係咁，我就去咗 Ada 銅鑼灣嘅地區辦事處做義工。當然，實情就係諗住畀我去參選做準備；最初係打算叫我去樂活嘅豪宅區，Ada 自己去選銅鑼灣。不過去到最後一刻，計過數樂活穩陣，所以都係 Ada 自己去返，我就去咗銅鑼灣。
20，最終，我當然係輸咗。但選舉唔係輸就贏，所以都無乜話唔開心。更重要係，我真心唔鍾意做選舉。而 Ron 亦都無去選，甚至連胡關李羅嘅 partner 都無做。
21，後生仔，就梗係覺得做政策先係有腦袋嘅表現；所以選埋呢次之後，我轉咗跑道，去咗做公共事務，後來仲搞 think tank ；為咗幫 think tank 搵出路，就走咗去搵黎智英，點知佢叫我跟佢做報紙。
22，由自由黨轉去蘋果日報，你轉變都幾大喎。其實先至唔係。大家記唔記得 2003 年？當時泛民同蘋果就叫人上街，但唔好忘記，田生都有份阻截廿三條；當時商界其實係唔支持廿三條立法。但政黨之間，立場上嘅分別無大家想像中咁大。亞洲金融風暴期間，仲可以有跨黨派聯盟。甚至乎我做主席嘅立法會議員助理協會，一樣都係跨黨派。當年政黨之間都有好多互動，例如某啲政策泛民熟啲，又上心啲，咪畀佢哋做主席，副主席就建制去做。反之，有時建制覺得緊張少少嘅政策同法案，就佢哋做主席，副主席就畀返泛民。
23，呢幾年嘅政壇見聞，我嘅總結係，首先，商界唔係唔支持直選，但有功能組別，就梗係拖得就拖；同時亦都係搵唔到合適人選；連我都搵就知人才荒有幾咁嚴重。其他政黨亦唔見得好好多，畢竟真正嘅政治人才，其實都走晒去做政務官。但到後來，連政務官都唔多似樣。或者，應該話世界在進步中，但香港仲停留過去。
24，商界處心積慮嘅人選，最具代表性嘅其實應該係唐英年。2012 年佢輸，事少，但佢輸嘅過程對方咁無底線嘅攻擊，先至係令人動魄驚心。佢真係差少少家破人亡喎，究竟有冇必要去到咁盡？如果唐英年明知咁凶險，又會唔會選呢？我又唔係佢，點知？但當時自由黨就企到好硬，亦因此同思歪反咗面。
25，大概就係 2012 年呢期，周梁淑怡（下稱：莎姐）搵我。最初都應該係諗住叫我去選立法會。啜？唔喇，我有外國居留權，唔值得放棄。但又咁講，莎姐可以不計前嫌，我係真心佩服。
26，有乜前嫌？2008 年，亦即係莎姐、田生等輸咗立法會直選，自由黨又有幾條友出走（之後成立經民聯）；呢段日子到 2010 年期間，自由黨都好迷失下。有啲政策立場，真係好肉酸。例如最低工資，你反對咪反對囉，有乜問題？做乜廿蚊張？當時有啲自由黨員覺得不滿，我就同佢哋講：「退黨喇。」其中一個就係當年我響 Ada 個選舉認識嘅林翠蓮（下稱：Alice）。
27，Alice 係自由黨一個傳奇人物，係一個好真，好率直嘅朋友。可惜佢早幾年去尼泊爾旅行遇到意外，之後就離開咗呢個世界。
28，當年我叫咗幾個朋友退黨，然後自己又入返去，其實都有少少唔係幾好意思。呢啲朋友當中，好多都漸漸唔再理政治。
29，2012 後嘅自由黨，諗住有機會翻盤；尤其係田生又重返議會。呢個時候，我見到田生活潑咗好多；後來佢甚至會玩 Facebook 。當然，係有個田毛毛幫佢，但佢自己都真係有 input 。
30，大概到 2015 年，隱隱約約我都覺得，自由黨想搵啲新人去選 2016 嘅立法會。例如田生自己排第二，想畀李梓敬上位。我知，好多人都唔鍾意李梓敬；但我認識嘅佢，係一個幾聰明嘅人，應該話係非常之聰明。
31，當年我哋朋友圈子，由淺藍到淺黃都有。過去呢三幾年，當中由淺藍變深藍嘅又有，由淺黃到深黃嘅都有。其實自由黨入面都有有人係心黃嘅，反而深藍嘅就去咗第二檔。
32，2016 年嘅立法會選舉，其實都唔係重點；因為 point of no return 係 2017 嘅行政長官選舉。可能大家會覺得，乜唔係思歪無得選咩？其實 Anyone but CY 從來都無終止過；但最終又點？今日條友仲不時指點江山；唔好忘記，佢仍然係政協副主席。
33，之前講到，商界最處心積慮嘅代表人物唐英年因為選行政長官，差啲家破人亡。2017 年商界自己無人，唔緊要，直接搵個現成嘅：曾俊華。我同佢嘅淵源，早在 2005 年佢做緊工商科技局嘅時候；個陣佢負責世貿第六次部長級會議，我就係傳媒同民間組織。個陣嘅印象已經係：「呢條友 okay 啱咀形，希望佢可以更上層樓。」
34，之後，佢又真係做埋財政司。個十年，我真係公器私用，專欄入面成日幫佢口；大膽講句，香港未有班薯仔之前，我都已經為呢個曾經被人鬧守財奴嘅鬍鬚叔叔護航。雖然我都唔知有乜用。
35， 2017 年曾俊華話去選，我都可以好肯定，呢次係商界最後一次嘗試推舉一個人選。更正確啲咁講，商界一直都以為，高度自治係真嘅；北京接受唔到泛民，都可以接受商界啩。第一次嘅創傷後遺症，係唐英年；而第二次，就係曾俊華。
36，雖然曾俊華就無穿無爛，但明明佢民望咁高，都要揀林鄭？唔好忘記，佢做過 FS 做過特首辦，一定過到 vetting ；再講，林鄭咪又係迷英嘅港女一名。所以，曾俊華輪，原因得一個：「幾時話畀你哋香港商界可以話事。」係，呢個訊息好明確。從此，商界就知道，香港同北京嘅關係係乜。
37，再加個小插曲。曾俊華選舉拍咗一系列嘅片，其中一條無乜人留意，主角係麥齊光。如果大家記得，佢係思歪政府最初嘅發展局局長，但只係做咗一個月唔夠。佢畀人爆好多年前嘅事，梗係有人由內到外咁操作，唔會係偶然。麥齊光呢個位，結果由陳茂波頂上，原因我諗我都唔需要多解釋。
38，曾俊華搵麥齊光拍片嘅原因係乜？個 message 係畀公務員聽嘅（但佢哋無選委 票）。另外，唔好忘記，做得發展局，同地產界別都係有多少淵源。本來我想用地產黨去概括咁形容商界，但諗諗吓又唔係好啱。因為 2012 年之後，香港已經無一個統一嘅地產黨，商界就更加係一個好闊嘅光譜。
39，講到呢度，本來，我都想話餘下的，都是歷史。但今日我都仲係想講個秘密。 2019 年 6 月 9 號晚，政府出咗份聲明，但之後我認識嘅政壇前輩當中，有人近乎爆粗，唔單係爆林鄭，亦都爆自由黨當時嘅主席張宇人。
40，之後嘅事情發生得好快，田生又同周太、Miriam 等搞希望聯盟，但主要都係田生；而我當時感覺大家都已經意興闌珊；至少唔似 2012 年個陣咁熱心。之後來連選舉都押後一年，然後「完善」埋個選舉制度，咁餘下的，真係都只有歷史。
靜靜雞講乜大家知，我仲做過一年嘅香港議員助理協會主席；成年都積極不干預，只係安排咗卸任嘅周年晚宴 😛
咁傳得嘅，我估都有啲真；但最終唔成事，有人話因為佢係鬼佬。佢對呢件事多少都有啲唔忿氣。唔係唔忿氣冇得做律政司，而係唔忿氣畀人話係鬼佬。「我阿媽係中國人，佢帶大我哋咁多個！」但實情係，當年佢啲中文稿，全部都係佢先起英文，然後我譯返中文 😂
當時有諗過從政嘅我，係有諗過讀多個 law。
Share this post