可能有好多朋友覺得奇怪，呢件意外發生咗咁多日，點解我依家先至嚟講。
今日我想分享吓呢幾日我對 Mirror 演唱會嘅觀察。其實我想亦借呢個機會講吓，乜嘢叫做「帶風向」。最後我想從呢件事同大家分享吓，今時今日公關危機處理係乜嘢一回事。
首先講吓點解我唔講 Mirror 單意外。首先係我唔喺在場，唔覺得我有啲乜嘢嘢可以評論。其實當時我見到有好多朋友喺 WhatsApp、喺 Signal 上邊分享咗一條短片，起初我仲以為佢哋係去啲乜嘢演唱會，冇意識到原來係 Mirror 嘅紅館演唱會。之後，我先至知事態有幾嚴重。無幾耐，見到網上好多人就將嗰啲短片，轉播開去。我覺得呢個情況，係正常嘅網絡生態。
又好快，就有啲輿論意見領袖，出嚟話啦想搵人去問責。另一邊廂，就有啲比較具影響力嘅輿論領袖，話如果有人見到呢條片受到刺激，甚至有創傷後遺症，可以去邊度搵啲幫手。言下之意，即係暗示呢啲條片，係傷害緊粉絲嘅弱小心靈。再過多一日半日，我見到有兩批意見。有一批意見領袖話，冇人想見到不幸事件，大家應該「集氣」去照顧受害者，尤其是阿 Mo，或者係嗰啲受到這情緒困擾嘅粉絲。另外一個主張就話，集氣同埋搵人問責，兩者必然嘅衝突。
其實意外發生之後，有個朋友都即刻聯絡我，問如果我係即係李澤楷先生嘅公關，我會點做。佢話如果係李生嘅老竇，可能已經親自去咗醫院， 慰問傷者。咁我又唔係李嘉誠，又知道佢會點做？但朋友講嘅個種做法，都係好傳統嘅公關手法。
過多兩日，我聽到啲有趣嘅猜測。有朋友話，講乜嘢創傷後遺症、首先要集氣等等，甚至叫人刪除埋嗰啲片，其實用呢啲所謂 社會意見領袖，都係「帶風向」，即係塑造民意。
傳統公關，好著重就係要俾人見到你做咗嘢。新時代嘅公關，重點係可以製造到輿論；製造輿論之後，其實最好就見唔到背後當事人係邊個。大家要記住，乜嘢係目的，乜嘢係手段。如果目的係希望要繼續保持住粉絲嘅支持，首要任務當然係關注佢哋係情緒感受。
先祈唔好誤會，我唔係話每件事背後都有陰謀論；又或者呢啲所謂嘅意見領袖全部都係已經比錢買起咗。我真係唔係咁嘅意思。
娛樂圈一直以來呢都係最識得去玩公關；呢個亦都唔係乜秘密。反而如果話發生咗咁大件事，都唔去處理，我先至覺得係出奇。我亦都相信，明星藝人嘅經理人，本來應該已經同意見領袖有啲來往；畢竟要營造氛圍，都係要透過呢啲意見領袖。所以，發生咗意外之後想管理下輿論，我覺得都好正常；第一時間聯絡相熟嘅意見領袖，亦好合理。相反，如果話佢哋由得件事自己去醞釀，好似滾雪球咁變大，我反而覺得唔對路。
再講多次，希望大家唔好覺得公關係啲乜嘢暗黑操作。其實自從出現大眾媒體，已經有人意識到，報紙電台電視呢啲平台，全部都係影響人心嘅工具。甚至乎係有大眾媒體之前，其實已經有好多更高層次嘅人，嘗試改變其他人嘅想法同信仰。過去幾千年來，教育同宗教塑造左各種文化係。積極嘅角度去睇，呢啲叫做「教化」。
我做過媒體，創辦過政策智庫，亦都個教過書，更加有做過公關顧問工作，經驗話我知，人好多時只係希望有啲事情佢可以相信，而我哋所做嘅工作就係填補人嘅心靈空虛。人哋想相信啲乜，我咁滿足佢哋囉。真係唔係夾硬要去塞啲嘢入人哋個腦；洗腦呢回事，都要被洗腦嘅人配合。
其實自從Mirror 呢個現象出現之後，社會上多咗好多類似嘅組合，甚至下荃灣買豬肉嘅成個韓仔泰仔咁。捧明星嘅手法，好多都值得寫入公關案例教科書。但可惜係公關呢一行，好難好似經濟學啊或者行為科學咁，用事實為本去做研究。亦 因為呢個原因，公關到而家都好神秘。
另一點就係其實公關呢行，個光譜都好闊；由最基本嘅操作，例如寫吓新聞稿、組織下活動，到藏於九地之下，動於九天之上，好高端咁影響社會整體氣圍文化嘅，凡此種種都係公關。
千祈唔好當公關係旁門左道好暗黑嘅事。其實我哋嘅思想同身體一樣，無時無刻都接受到唔同你感染。我哋嘅身體，就會受病毒細菌感染，而我哋嘅思想就會受到其他嘅思想嘅影響。
英文有句講法：What doesn’t kill you makes you stronger.
當我哋接觸到唔同嘅想法嘅時候，只要係察覺到呢啲想法嘅來龍去脈，自自然然就會產生思想嘅抗體。最可怕嘅事，係當我哋被唔同嘅想法感染之後，但自己又不自覺地去散播呢啲想法，成為思想嘅超級帶菌者。
最後，我有個哲學難題，無答案，留返畀大家去參透：
有時我哋會以為，自己可以選擇我哋相信嘅事。但究竟人係唔係有呢種自由意志，去選擇我哋自己想相信嘅事呢？
Share this post