老闆：
法庭宣判前兩晚，我發咗個奇怪嘅夢。夢入面我返咗公司，同啲 sales 嘅同事開會，就好似以前咁。夢入面嘅我，明知係發夢，都唔介意沉醉多一陣。
瞓醒，又撞啱周末我哋呢邊嘅香港人有個聖誕節聚會。我同朋友話：「尋晚發夢返工。」
點知一個二個會錯意，以為我近來工作壓力大。
「唔係呀！返工係好開心嘅事。」
肯定連你都唔知；最初搞直播，我曾經最高紀錄係四日無離開公司，朝早去五樓沖涼再食個早餐就開工。
不過都真係好多年前嘅事；個時仲後生。
過去呢六年，反而感覺好虛幻。試過係陌生嘅環境，見返啲熟悉嘅朋友。網上見到熟悉嘅地方，桃花依舊，但人面全非。最近，又試過忽然間有種大家都知道係似曾相識嘅感覺，但偏偏要壓抑住。
由個人到世界，呢六年嘅變化真係好大。
我終於明白，原來人可以承受好大嘅壓力，漸漸都會習慣，甚至乎會好識去享受呢種肩膊…
