Chiikawa 智破排隊黨

好多人一見到黃牛黨（排隊黨），先入為主會覺得有啲人真係好多時間。但今日就想講，其實排隊搶購帶來嘅宣傳價值，真係有錢都買唔到。

又有人覺得，幾十歲人都追求啲限量版嘅產品，好唔成熟。但心頭好嘅嘢，係個人主觀嘅選擇，旁人最多都只可以話自己會唔會咁做，至於其他人點做，真係無乜可以批評。

我只會話，如果從理財角度，好多人都忽略咗時間嘅價值。

今日另一個重點，就係大量工業化生產之下，令到消費者對一啲限量嘅產品出現需求，尤其係發展中社會，好多消費者會以「有錢都買唔到」嘅物品，去炫耀自己嘅身份。我用「炫耀」呢個詞語，唔係貶義；呢種肯定自己嘅行為，係人心底好原始嘅慾望，甚至動物都有呢啲行為。

所以，與其咁多批判別人，不如了解現象背後嘅動機；至少個人層面可以自我反省，社會層面亦都可以諗吓市場運作，甚至搵到啲商機。