話說我見國際能源組織最新嘅報告，話非油組國嘅原油產出量，已經超過油組國加俄羅斯；其實呢個現象有好重要嘅符號意義。當我諗到要點樣去講呢個題目嘅時候，我就諗不如借用 Daniel Yergin 本 The Quest 去講呢個題目。
The Quest 嘅第一章，一開始講嘅，就係蘇聯解體。
近來又見大家咁鍾意聽啲有歷史意味嘅演說，今個星期不如就由戈爾巴喬夫 1991 年聖誕節嘅下野演說開始。
從戈爾巴喬夫嘅主觀角度去睇，當年歷史關鍵時刻，究竟發生咗啲乜嘢事？
親愛嘅同志、各位市民，由於新形勢嘅出現，獨立國家聯邦嘅成立（Commonwealth of Independent States，CIS），我宣布我辭去蘇維埃社會主義共和國聯邦嘅總統一職。
我作出呢個決定，係出於原則上嘅考慮。我堅定支持各個共和國嘅主權、自治，但同時我亦都堅持聯邦嘅團結同統一。
但事與願違；支持分裂國家同政府嘅政治勢力佔咗上風，而我個人係無法同意呢種主張。阿拉木圖會議（Alma-Ata Protocol）嘅決議，亦都無改變到我對呢個問題嘅立場。此外，我認為咁重大嘅決定，應該要由返畀人民去表達佢哋嘅意願。
話雖如此，我仍然會繼續盡我所能，令呢個協議能夠帶真正社會和諧，並擺脫目前嘅危機，繼續推動改革進程。作為蘇聯總統最後一次向大家發言，我認為有必要表達我對自從 1985 年以來我哋走過嘅路嘅反省；特別係當中有好多矛盾、膚淺以及主觀嘅評價。
響命運嘅安排之下，當我成為國家領導人嘅時候，呢個國家已經明顯唔係咁妥當。我哋擁有好豐富嘅一切：土地、石油、天然氣，以及各種其他自然資源，而上帝亦賜予我哋大量嘅人才，偏偏我哋嘅生活卻遠遠不及發達國家，而且愈來愈落後。
原因昭然若揭：嗰個乜都要插隻手落去嘅官僚制度窒息咗我哋嘅社會，乜都要為意識形態服務咁梗係死路一條，再加上軍備競賽嘅沉重負擔。呢個政府已經到達咗佢能力嘅極限。我哋試咗一啲小修小補嘅局部改革，而且試咗好多次，但係每次都係失敗收場。國家走入迷失；我哋唔可以繼續咁樣生活落去，一切都需要徹底改變。
亦因為係咁，我從來冇後悔過，一次都冇；我冇用自己作為蘇維埃總書記嘅職位，令自己好似一個沙皇咁，統治幾年就算。我認為咁樣做係不負責任同不道德嘅。我意識到喺我哋嘅社會，展開一場咁大規模嘅改革係非常困難，甚至係冒險嘅事。直到今日，我仍然深信從歷史嘅角度，由 1985年春天開始嘅民主改革係正確嘅。
但改革一個國家，想由根本咁去改變世界，過程比預期中要複雜得多。但我哋所做過嘅事情理應得到合理嘅評價。社會得到自由，從政治同精神嘅束縛解放出來，呢個係我哋至今仍然未完全明白到嘅成就，就係因為我哋未學識點樣去運用呢一份自由。
但呢個咁具歷史意義嘅工作已經完成。剝奪呢個國家成功同繁榮機會嘅極權制度已經被取締。呢個係民主變革嘅道路上最大嘅突破。選舉嘅自由、新聞自由、宗教自由、代議政制、多黨制等已經近在眼前，人權亦都被確認成為是至高無上嘅原則。
我哋已經開始邁向多元化嘅經濟，各種形式嘅產權逐漸建立起來；農地改革數將以百萬畝嘅土地交返畀人民，農業復甦，自耕農重現。
生產者嘅各種經濟權利亦漸漸得到合法保障，企業家精神、股份制、私有化正迅速增長。喺將經濟模式轉向市場主導嘅同時，重要嘅係記住，呢啲一切轉變都係為咁每一個個體，但喺這個艱難時期，我哋亦都要關注社會保障，尤其係對老人家同細路仔。
我哋生活喺一個新嘅世界。冷戰已經結束，軍備競賽已經停止，亦都停止咗扭曲咗我哋嘅經濟、集體嘅感受同道德嘅瘋狂軍事化，解除咗世界大戰嘅威脅。我要再次強調，喺過渡時期，我已經做咗一切去確保核武器嘅係受到控制。
我哋開啟咗走向世界嘅大門，放棄干預人民私事，停止派遣部隊越過國界，結果係換來世界社會嘅信任、團結同尊重。
我哋呢個國家不同民族嘅人民，獲咗真正自決嘅自由，可以選擇自己嘅生活模式。尋求民主改革成為一個新嘅多民族國家嘅過程，將我哋帶到簽訂一個新嘅聯邦協議。以上所提到嘅變化背後其實有係沉重嘅壓力，係經過激烈嘅矛盾掙扎，先至可以從舊有、過時嘅對抗力量嘅手中爭取得到。
舊嘅體制崩潰咗，但新體制未能及時開始運作，目前嘅社會危機更加嚴重。
今年八月嘅政變將整體危機推到極限。呢場危機製造最大嘅裂痕，係可能會令到國家解體；而今日，我仍然擔心嘅我哋嘅人民會失去作為一個偉大國家嘅公民身份，後果對每個人來講都可以係非常嚴重。
我認為保留過去幾年嘅民主進程非常重要；呢啲成就係用我哋整個歷史嘅苦難、我哋悲慘嘅經歷嚟換取嘅。喺任何情況下，不論任何原因都唔應該放棄，否則我哋只會埋葬咗對未來美好嘅一切期望。我好坦白同直接咁同大家講，呢啲係我嘅道德責任。
今日我想對所有支持國家創新政策、參與實施民主改革嘅人民表達我嘅感激；多謝每位政治家、政治及公眾人物，以及海外嘅數以百萬計，認同並且支持我哋理念嘅人，一直以來嘅諒解同支持，並且願意開始同我哋真誠合作。
我帶著憂慮，但亦帶著希望同信念咁離開我嘅職位。我信任你哋嘅智慧同精神力量。我哋係一個偉大文明嘅繼承者，而呢個文明能否重生成為一個新嘅、現代嘅、有尊嚴嘅社會，就視乎我哋每個人今後嘅作為。
我衷心感激每一位多年來為咗正義而同我並肩作戰嘅戰友；過去有啲錯誤的確可以避免，有啲事情可以做得更好，但我堅信，遲早我哋共同嘅努力會開花結果，我哋嘅民族將會係一個繁榮同民主嘅社會。
我祝願各位一切順利。
Share this post