匯豐澳洲嘅零售銀行業務，2025年除稅前溢利仲有6億幾澳元，按年仍然升近一成。話雖如此，匯豐澳洲嘅樓按市場，市場佔有率只得1.5%；四大銀行加埋第五大嘅麥格理，都遠遠拋離佢。
最終，匯豐澳洲都係要賣盤退場；360 億澳元嘅樓按同個人貸款組合，由黑石旗下嘅Virgo BidCo接手，佩珀金融負責日常貸款服務。呢單交易其實早在 2023 年 12 月佩珀接手匯豐紐西蘭嘅按揭組合就已經開始，到今年 7 月 31 日先至有最後答案。
匯豐整個集團市值當然大，但喺澳洲呢個高度集中嘅市場，佢從來都唔係主要玩家。規模太細之下，合規成本反而不合比例咁高。聯邦銀行行長話，單係防詐騙，佢哋每年就要洗9億澳元；要知道匯豐澳洲全年先賺 6 億，各種合規嘅固定成本肯定嚴重影響匯豐澳洲零售銀行業務。2024 年一連串冒充匯豐嘅SMS詐騙案，最終演變成澳洲證券及投資委員會（ASIC）向匯豐提告，判罰3500萬澳元，有苦主嘅戶口甚至被封鎖542日先解封。連匯豐自己主打嘅信用卡回贈，喺澳洲呢個高度集中嘅市場度都幾乎冇得賺。
更重要係，匯豐有更多更好嘅方法選擇，趁有價有市將零售業務出售，係非常之合理嘅決定。
