01，「今年有冇錢派？」我明，呢個係大多人最切身嘅利益，亦唔怪得大家最關心呢樣嘢。我甚至乎覺得，政府最希望大多數人只會爭論呢件事，而忽略真正嘅問題。
02，真正嘅問題係乜？香港係唔可以出現「結構財赤」，完。
03，「香港未有結構財赤，唔駛驚喎。」係技術上未；但到真係有結構財赤嘅時候，香港亦返魂乏術，因為我哋有三大難：一，減開支難。二，加稅難。三，發債亦都難。
04，先講減開支難。由 1997 到 2003 年，香港經濟夠衰喇啩，但當時嘅政府都減唔到開支。經濟唔好又點減開支？唔係話要逆周期咩？但經濟好嘅日子，就更加唔會減開支喇，係咪？結果就係，政府開支只係有加無減，問題係加得有幾快。
05，話雖如此，2003 年特區政府嘅財政儲備，仍然可以支撐 15 個月嘅開支；依家嘅財政儲備，就只有 12 個月左右。
06，未來幾年，以最理想嘅估計，亦只會維持呢個水平。今年嘅財政預算案，將未來嘅經濟增長預測，由 3% 上調去 3.7% ；究竟憑乜咁有信心呢？
07，成份預算案演辭，陳茂波最少兩次責怪「外國勢力」抽緊銀根。但如果佢認為美元會持續強勢，咁就有第一個矛盾。要知道，從來強美元嘅時候，香港不論資產價格（即係樓、股）抑或本土消費，都唔會好。所以，如果係咁，香港又何來上調增長預測嘅空間呢？
08，香港政府嘅收入，除咗薪奉稅同利得稅，另外兩大就係印花稅同土地收益，例如賣地同補地價。印花稅同土地收益，一定係同資產價格周期掛勾。有股市樓市好景，香港政府就大把錢用，否則就⋯⋯
09，問題係股市樓市，唔係話你想佢升就升；更重要嘅問題係，因為香港呢個特點，令到地產黨長期都係一個「共治伙伴」嘅角色。似乎北京好唔鍾意呢個現象，所以亦一直用各種方法想取替香港嘅地產黨。
10，事實上，目前香港最重要嘅地產發展商，已經由港鐵扮演。所以呢份財政預算案都有提到三條新鐵路幹線，亦解釋得到點解香港嘅城市發展會係由鐵路主導。當然，從城市規劃嘅實際需要，大型集體運輸系統都有一定嘅必要，但港鐵嘅主導地位，亦都有制衡各地產發展商嘅意義。
11，至於薪奉稅同利得稅，政府當然可以加，亦可以唔需要怕市民嘅不滿，但要知道新加坡嘅稅率只要稍為比香港吸引少少，就已經可以令有選擇嘅人再多一個理由轉移陣地。
12，加博彩稅、煙稅、油稅得唔得？那怕係柴油，都有走私紅油；外圍波馬、私煙等就更不在話下。任何生意，尤其係地下經濟，一旦建立起銷售嘅渠道，每次加稅都等於幫地下經濟增加需求。結果未必可以增加稅收，但一定令地下秩序嘅利潤更豐厚。
13，銷售稅有冇得諗？諗就梗係可以諗；但北區嘅居民返深圳消費囉。
14，加稅杯水車薪，最終得返發債。今次講嘅債，主要係三隻：綠債、銀債、基建債。
15，綠債，你估真係為環保？我估計係日後啲強迫金或各種「豬仔錢罌」，都一定要有啲 ESG 嘅元素，又同時要限制要風險水平係「投資級別」，試問坊間有啲乜嘢選擇？政府發嘅綠債囉。「嗱，我哋唔係為等錢駛所以發綠債呀，為環保，為未來一代，為發展市場咋！」 但客觀嘅實際效果，就係將市場嘅資本，變成政府可以用嘅錢。
16，銀債，就更加係打長者主意。大家記唔記得幾年前羅致光提過，話考慮唔好畀啲人 65 歲以後提走啲強迫金，變成每個月出糧？當時咁講畀人 X 到撻皮，依家換個包裝叫做「銀債」，得咗！
17，基建債，由機場三跑以政府作擔保發債，就已經開咗個先例。但今時今日香港咁做，尤其係明日大嶼同北部都會區，都令我諗起大陸嘅「城投債」；不論係政策嘅背景、動機以及操作，都非常之相似。
18，陳茂波話要將香港政府嘅發債規模，由依家嘅 GDP 4% 加到 10% 左右；政府嘅開支係 GDP 嘅 25% ；咁計條數咪唔會有赤字囉，短期。
19，「借定唔借？還得到邊駛借？」記住，基本法 107 條嘅量入為出平衡預算，唔係單純為紀律而紀律，係任何聯繫匯率制度必須要有嘅條件。
20，成份預算案演辭，都唔知講咗幾多次「發揮香港優勢」；但乜嘢係香港嘅優勢？我會話係美元化嘅經濟，令香港一直係真正嘅國際金融中心。如果無咗呢一點，香港仲有乜嘢優勢？簡單低稅？法治？
21，與其話背靠大陸，不如話大陸一直借香港獲取國際資本，與此同時一國兩制嘅防火牆，又令到大陸可以唔需要改變自己嘅制度；而今後呢個角色，將會由新加坡去扮演。新加坡又親中又親美，又不親中又不親美，friend 得來又獨立。真係有錢嘅大陸人，都唔會諗香港，直接去新加坡開 family office 。
22，與此同時，中產又漸漸離開。最後香港最主流，會唔會就只係排隊等入住簡約公屋，得閒就返深圳消費嘅新香港人？但見到每年啲群眾最關心就係派幾多消費券，其實我哋距離呢一日又有幾遠呢？有時我都唔知，呢個城市嘅淪落，究竟純粹係因為一班庸碌無能之輩亂來，定係北京刻意要透過改變香港去證明啲乜嘢。
Share this post