Youtube
本來今日無打算再寫嘢。剛剛幫 看中國 同 梁珍 分別錄完三條片之後，完全消耗晒啲腦力；由芯片講到平安拆匯控骨再到自由黨最後講埋中概股回歸，前後夾埋成三粒幾鐘，極費神。
坦白講，我好懷疑 Youtube 嘅觀眾，究竟係想聽啲乜；係唔係呢啲題目？但我又唔見其他人講（可能有，我唔知。）
講開又講，大家知我有自己嘅頻道嘛？ 利世民 - YouTube
實在太多人同我講，拍片喇，錄 Youtube 喇。有段日子，我覺得自己作客去其他人嘅頻道咪好囉。但係好快就發現，呢個世界有兩種人。第一種，想睇啲同平時唔同嘅觀點。另一種，就係想聽啲自己想聽到嘅說話。
兩種人好難同時滿足；我亦假設，多數人自然情況下，都係後者。所以，我都明白我嘅讀者、聽眾群，應該係會少其他人一大段距離。
我又發現，自從轉變咗模式，即係「以拍片為目的」咁去寫稿，呢個 email 嘅 open rate 好似稍為有啲影響。我唔知道究竟係題目嘅問題，定係內容鋪排嘅問題。
抑或純粹只係八月底暑假就快結束前，必然有嘅現象？
Twitter
我嘅 Twitter 都幾廢；廢到一個點，完全係零 engagement 。
當然，我諗主要係我嘅問題，唔同嘅平台，有唔同嘅群眾。但都幾肯定，Twitter 嘅宇宙已經非常擠迫，我亦無乜心機去經營，只係順手將機械式咁貼下堂就算。但似乎順手貼文，係近來 Twitter 好想打擊嘅內容。
好似早兩日篇講 【傳媒解讀片】如何辨別假資訊 Twitter 話係 Sensitive material ：
無所謂；我諗我個 twitter 係廢到一個點，應該係唔會有乜嘢分別。
但我都幾肯定係啲簡單原因觸動到佢哋嘅規則。 可能只係見到「假資訊」三個字就 flag ，又或者係 substack 嘅 link 就自然 tag。
其實我都只係想將某啲好重複嘅程序，自動化；但自動化，又好易觸動到 Twitter 、Facebook 裡面專門去捉其他 spammer 嘅機械人。
偏偏真嘅 Spammer ，佢哋又捉唔到。近來我久不久就將 Facebook Page 嘅留言封鎖，又真係好似好少少。
香港人的 PPE
暫時 delivery 效率最高仍然係 email ，雖然更多人係唔用 email 。我又發覺，肯去讀 email newsletter 嘅讀者，水平又高少少。
做人，真係要選擇即合自己嘅主場。但係我仍然覺得，錄片、錄 podcast 有本身嘅價值。但如果話要保留香港話嘅文化，影像聲音嘅效率高過文字好多。當然假裝係內容值得保留到未來。
有乜內容值得保留？歷史囉。講咗都成年嘅「香港紀事本末」，寫極都只係得頭兩章；咁不如斬件上？斬件上又不如先口述一次。
如是者，我自己嘅 Youtube 頻道嘅主題系列之一，就係「紀事本末」。
另一個，就係「香港人的 PPE」。
「PPE？Personal Protective Equipment？」又係喎，其實 acronyms 真係唔同時空有唔同解讀。
之前有朋友想我講多啲 PPE ，即係 Philosophy 、 Politics 、 Economics ；最初應該係 1920 年代，亦即係近代進步主義最盛行嘅日子，牛津開嘅本科。PPE 嘅特點係跨唔同範疇，著重實用。
呢個初衷，同我當時想將自己嘅平台叫做 unsubject 一樣喎；但 interdisciplinary 嘅意識，唔係三個範疇各有各講，而係要「搓埋做瀨尿牛丸」。 學問功夫，其中之一就係將兩件好似唔關係嘅事，搵出有意義嘅關聯；重點係有意義，而唔係夾硬穿鑿附會。所以呢個 project ，於我而言都係一個自我提升嘅學習過程。
話說回頭，用用下 unsubject，點解整整下又用返利世民呢個名呢。因為 Youtube 上面有啲觀眾話：「咩 unsubject 呀，啲人淨係知利世民之嘛。」好，咁改返喇。呢次 branding 教訓有兩個：（一）市場永遠係正確；（二）attention 永遠都係短缺。
由舊年開始嘅讀書會；我對呢個 project 係完全無放棄過。之前以寫文嘅方式，但諗諗吓講書先至最應該錄片、錄 Podcast ，放返入 PPE 嘅
最近我睇嘅一系列書，其實都有一個重點，就係如何戰勝 cognitive biases。當然，人就始終都會犯錯，但有良好習慣，有系統去減輕犯錯帶來嘅損失，長遠來講，效果可以好明顯。
總之，有拖無欠。
傳媒解讀片
Youtube 頻道最後一個系列，暫時諗到嘅係「傳媒解讀片」；呢個系列，一來希望解吓 social media 嘅 toxic culture ，二來都係要為個頻道去增加下啲流量。雖然我話自己唔志在要好多 subscribers ，但可以 reach 到更多人，梗係好。
究竟可以咁點樣可以增加流量呢？不如就揀當時多人講嘅題目，順個便，從逆思維咁去拆解主流嘅講法；但點樣唔令人感到冒犯呢？我相信都係一種修為。另外就係點樣貼市之餘又唔會跟車太貼呢？暫時我都未諗到。
財經自由講
最後預告，我同自由亞洲電台將會有個每星期嘅節目，叫財經自由講。主題都係中、港嘅金融財經，呢個節目，我嘅角色會係主持兼任類似監製，亦會搵啲拍檔合作主持。
過去幾個月，其實我都有構想過開個財經節目；更想日日，開市一轉，收市一轉，建立大家嘅習慣。聽財經嘅應該係另一個觀眾聽眾群。
更重要係，假如做一個在商言商嘅財經媒體，最理想有三個獨立嘅位置，不多亦不少：
（一）【主持】觀眾聽眾，都係跟人；一條友講財經唔可行，亦唔可能講足咁多日。節目主持嘅 KPI 係 engagement ，要觀眾聽眾建立習慣；
（二）【監製】由前期到後製；由物色主持，搵嘉賓，度題目，搵資料，到後製，包裝，上 social media 出 post 等。有冇一個咁多功能嘅人？我覺得可能有嘅。監製嘅 KPI 係 Growth ，要有新嘅觀眾聽眾；
（三）【Business Development】：除咗賣廣告以外，我見市面上仲有好多方法搵到錢。呢個位最考功夫，係如何 align 觀眾聽眾、客戶以及主持利益。當然，BD 嘅 KPI 係長遠嘅收入。
以上咁計，最少都三個人。監製就一定係全職；反而主持、嘉賓同負責搵生意嘅，最初可以係自由人。當然，創業當然就預咗一腳踢，即係監製為主，兼任另外兩個角色。
但正如剛剛所講，我仲有咁多願望，未能夠全職去做呢個 project 。由於暫時以上呢個目標遙遠咗少少，所以都係作客去人哋嘅平台，一個星期一次，實驗下，又睇下個 feedback 係點。
Share this post