餅店財技

Crostini 全線結業，我第一時間聯想到係 1997/98 年 亞洲金融風暴 摺埋嘅超群。

今集 Podcast 主要想講 泡沫經濟 同 預售式消費 嘅關係。

另外一個想分享嘅題目，就係企業嘅生存。

一般企業，遇到經濟不景；首先會開源節流，而唔係突然死亡。企業通常會用盡各種方法，但如果都經營唔到落去，最後先至會被動地被債權人清盤。所以只可以話，突然死亡嘅企業，唔正常。

此外，賣西餅當然不及賣股票好搵。泡沫經濟之下，由於賣股票實在太好搵，所以賣西餅只係手段，賣股票先係目的。但如果見到最終無得賣股票，好自然就連西餅都懶得去賣。

對於消費者來講，泡沫經濟未必唔係好事。重點係，記住，幫趁還幫趁，有便宜就一定有代價。

預售式消費 ，通常都會以折扣吸引消費者；但價錢最終都係由店方去訂，所以折扣都只不過係表面上嘅好處。

但對於已經預先實現咗收入嘅店方，就等於無利息支出之下，得到融資。錢到手，自然就會心思思，攞呢筆錢去搵轉快錢。

最後，如果歷史係教訓 ，通常類似嘅倒閉事件，一不離二，二不離三；呢個亦都意味經濟寒冬嘅開始。