以下呢篇「漢服之亂」，其實係舊年三月嘅一篇文章 / Podcast ；見呢排又有人著漢服周街走，唔爭在我又攞啲舊文周街貼。
你會唔會見到有英國人要著到好似十六世紀嘅人咁樣？唔會吖嘛。點解？因為咁做真係無意思。
真正文化自信，首先係：「唔需要去證明啲乜嘢。」
所謂嘅西裝，係咪英國人發明？唔知，亦唔會有人成日掛響口邊。我相信全世界對時裝嘅睇法都一樣：「你鐘意點著，絕對係你嘅自由；但笑你戇鳩，亦都係我嘅言論自由。」
所謂漢服之亂，請容許我坦白咁講：「絕對係戇鳩。」
可能有人會話：「日本人都著和服；蘇格蘭男人著裙添。點解我哋唔可以著漢服？」
可以，如果係一個自然自發嘅現象。但目前呢個所謂漢服，其實只係一班人為咁畀人見到自己好愛國愛黨，唔知可以做啲乜，唯有做到出面嘅政治表演。
再講，歷史上究竟有冇出現過所謂嘅「漢服」？
可以大膽講，元、明、清呢幾個時代，大多數人嘅穿著都應該有唔少轉變；尤其係上層社會。而依家班人所謂嘅漢服，有理由相信係幻想中嘅明代嘅服裝（圖二：明代墓穴嘅壁畫；發現地點：山西大同），你見到好似做大戲咁嘅漢服，應該都係諗多咗。
最後，乜中華人民共和國得漢人咩？其他例如維吾爾族、藏族，係唔係一樣可以發揚光大佢哋嘅文化、生活風俗同宗教信仰？
講落去，只會發現更多不方便嘅真相。其實，我都唔想畀人以為，我成日就只會針對某個神奇國度。但事實就係呢個社會，呢個政權，實在有太多不能自圖其說嘅地方。
今時今日所謂中華文化咁「濕滯」，我相信其中一個原因係：好多人都覺得現代化就等於西化。甚至我身邊嘅朋友都係咁諗。呢個深入民心嘅諗法，亦解釋咗點解神奇國度到今時今日仍然不斷強調要現代化，但唔要西化。
百幾年前，又係中學為體，洋學為用，結果係唔湯唔水，原地踏步。
究竟乜嘢係現代化？船堅炮利？2025 自主研發？佢哋就係到今日都仍然覺得，現代化，就係物質上嘅滿足。中國人對外面嘅世界，過去幾百年文學、哲學等範疇嘅進步，一概不聞不問。每每講到呢個話題，佢哋劈頭第一句就話：「西方個套有好多問題，我哋中華傳統文化博大精深⋯⋯」
又或者：「西方好叻咩？殖民呀，帝國時代呀，呢啲就係佢哋野蠻嘅行為同歷史嘅血跡。」
外族即夷狄，係次等文化，呢種心態，基本上解釋咗點解神奇國度自十六世紀就開始大落後。
甚至到廿一世紀，仍然係乜都都要分東方西方；好似西方嘅嘢有問題，所以東方嘅就係答案。呢個咁嚴重嘅邏輯錯誤，呢種偽二元對立，究竟幾時先至可以收皮？
究竟乜嘢係「西方個套」？乜西方得一套咩？東方，又係唔係得一套？
文學、哲學、甚至美學等，以上所講嘅呢啲綜合就成為文化、人文素養；，就一定隨時代發展而變。廿一世紀嘅生活，自然有有廿一世紀嘅文化同習俗。所謂嘅西方東方分別，只不過係人家有不斷進步，而你就固步自封。
唔通夾硬去著十六世紀嘅裝飾，去用十六世紀嘅思維價值觀，就代表忠於傳統？其實佢哋呢啲無內涵嘅行為，只係用行動說明再之反證：「原來呢個地方嘅人，佢哋嘅人文素養，原來真係幾百年來都無進步過。」
另一個反映中華文化無法現代化嘅現象，就係過去百幾年，呢個地方上面嘅政權，精英同知識份子，都無辦法建立出一個有貫穿力嘅「中華民族」身份認同。
百幾年前尚且有個構想要「五族共和」，但百幾年後就就淪為漢民族至上主義。
結論就係，「中華民族」好難搵到最大公約數，由語言、文化到生活習慣，要十四億人用一個共同身份，基本上就只要完全拋棄歷史嘅包袱先至可以做得到，例如共產主義無產階級專政。
但偏偏無產階級專政又完全不可行，當一切政治謊言都行唔通，佢哋就只有返去最粗糙嘅政治，最基本嘅敵我矛盾，即係民族主義，文明嘅嬰兒病。
畢竟，構造歷史又係一個好使好用嘅政治手段。但由於歷史有太多不能面對嘅事，當中又有太多唔連貫嘅地方，結果就有好多非驢非馬嘅鬧劇，例如漢服之亂。
講到呢度，小粉紅、藍朋友可能仍然堅持：「點解唔可以宣揚傳統民族服裝？蘇格蘭人有，日本人都有喇。」
最膚淺嘅反駁係：「又話文化自信？點解忽然又用蘇格蘭人，日本人去證明自己？」
深入少少，我就會話，無錯蘇格蘭人都會著傳統服裝，但知唔知點解佢哋要做到咁出面？話說佢哋幾百年來蘇格蘭受英格蘭嘅統治，但好在無經過好似文革式嘅破壞；更重要係，過去幾百年來，蘇格蘭嘅哲學、文化，對整體人類文明進步都有貢獻。所以，人家可以既慕古又現代，亦唔會有違和感。
呢啲就真正嘅文化自信；正所謂，面，係人哋畀嘅。
日本嘅情況亦都類似。經歷過脫亞入歐嘅思潮，之後係民族主義嘅泡沫，到第二次世界大戰敗後，又再變多一次。百幾年內，日本嘅社會同文化，經歷過三次重大嘅轉變；更重要係，到咗廿世紀嘅後半，人類文明有唔少嘢來自日本，包括流行文化。
現代嘅日本，係一個真正嘅現代社會，但現代嘅日本人亦亦無同歷史割裂；人家可以正視歷史，所以著和服去行山亦無違和感。
點解小粉紅、藍朋友嘅漢服硬係畀人一個怪異嘅感覺？原因係佢哋都唔能夠面對歷史，但又要用歷史去證明自己。
最後，有個問題我更加係百思不得其解：「神奇國度嘅美學點解係咁獨特？」
到目前為止，我唯一嘅諗到嘅解釋就係，過去百幾年來，神奇國度嘅傳統精英文化完全被摧毀，留返就只有下層社會嘅風俗；結果就係今時今日呢班人，根本唔知傳統精英社會嘅文化係乜，連古典嘅美學修養亦失傳。所以新中國嘅事物，美學嘅標準係咁粗俗，根本講唔上係美學。
留意返，我所講嘅傳統精英文化嘅摧殘，唔只係 1949 以後；嚴格來講係由廿世紀初開始，甚至有人會認為，「涯山以後無中國」，即係宋末之後就已經無晒所謂嘅中華文化。
但現實啲咁分析，1919 前後，比較明顯見到中國傳統文化嘅躁鬱；當時呢片土地上僅餘嘅知識份子有兩類。新文化運動嘅一班，對傳統文化，尤其上層嘅精英文化完全不屑，甚至連漢字都覺得要改革成拼音；其實呢一派部份加入早年嘅中共，有啲漸漸消失於歷史，留低最後一班，亦都過唔到 1960 年代。
另一派，就係新儒家，亦都係元祖大中華膠，大陸個班當然係過唔到 1960 年代；當中有部份過咗去台灣，有啲留低香港。新儒家大中華膠如錢穆等人嘅觀點，包括大一統是光明偉大嘅歷史任務，遼、金等係侵犯我大中華嘅外族，分裂局面係黑暗時代等，全部都寫入中史教科書。
錢穆等人在生嘅時候，應該點都唔會想像得到，有朝一日佢哋嘅觀點，會異變成今時今日呢種奇形怪狀嘅新民族主義浪潮，成為中共嘅統治工具。
大家千祈唔好誤會，我並唔係要鞭撻新文化運動嘅旗手，又或者新儒家嘅大中華膠；又或者要大家二選一。我只係想透過今日嘅分享畀大家見到，神奇國度嘅本質，就係咁難進化。
我相信神奇國度咁難進化嘅原因，因為深層文化裡面，呢度大多數人都以為神奇國度與別不同；乜嘢都分東方西方。
佢哋深信周公制禮作樂，係人類歷史上最了不起嘅事，只要可以回到過去，就天下大同，一天光晒。呢度嘅人唔願意去了解環境點樣變化，亦唔會去了解制度會點樣影響人嘅行為，佢哋千百年來都希望有好嘅領袖，就會有好嘅政府；有好嘅政府，人民就會有好嘅生活。
如是者，神奇國度幾百年來都無進步過，幾百年來都係一個尋租社會，幾百年來都發展唔出真正嘅科學精神，幾百年來孕育唔到真正嘅人文素養。
但所謂嘅中學為體，又往往只係流於表面，例如漢服之亂。
Share this post