曾幾何時嘅美國夢、澳洲夢甚至係香港夢，唔係啲乜嘢奢望；有好幾十年，大多數人嘅合理預期係，只要努力讀書搵份好工，就可以過安穩嘅中產生活。
不過，按照目前嘅情況睇，下一代要白手興家比我哋個一代更難；有啲人話係全球化令競爭越來越激烈，有啲人認為係資本主義社會之下，收入同財富越來越集中。
呢種情況自然會影響到政治同文化。有啲年輕人調整預期，有啲就變得更懷疑全球化同資本主義自由市場；尤其係已發展社會，以上所講嘅情況就越明顯。其實今時今日嘅所謂「右」，不但反對自由貿易，反對資本嘅流動，而且呢一班所謂嘅「右」，不論年紀抑或社會階層嘅跨度都非常之咁闊。
而所謂嘅「左」，亦唔見得好認同自由貿易，唔見得好接受人口同資本嘅自由流動。今時今日政治光譜上嘅「右」同「左」，其實係三十年前嘅「左」同「極左」。諷刺嘅係，新嘅右反而會話支持「自由貿易」嘅人係「左膠」，呢個現象真係有啲不可思議。
「去全球化」會唔會令年輕人競爭細咗？其實以我嘅觀察，過去廿幾年來，競爭最激烈嘅唔係社會上最精英嘅 1%，而係 0.01% 。由 95% 到 99% 嘅競爭，過去都無乜點變化；但由 1% 要去到 0.01 % 就變得越來越難。記得 2011 年有位經濟學家 Tyler Cowen 曾經寫過一本書叫 The Great Stagnation ，話已發展國家早在 1973 年之後，其實家庭收入增長已經開始放緩，好多真係可以提高經濟生產力嘅創新亦「買少見少」，之後嘅日子歐美國家嘅創新其實都只係一啲 low hanging fruit 。當時我同好多人都一樣，覺得 Cowen 係低估咗資訊科技帶來嘅影響。不過，如今睇返轉頭，佢所講嘅亦都唔係完全無道理。
樂觀嘅人就會覺得，AI 同能源科技上嘅突破，未來十年甚至廿年會真係再帶來根本上嘅改變。但悲觀嘅人就會覺得，好多從前我哋熟悉嘅經濟現象，尤其係工作、收入模式等，將會同過去有好大分別；我哋好多人會無咗份工，經驗唔再重要，取而代之係學習新事物嘅能力。好似我呢啲就快五十歲嘅人，過去已經要計劃退休。但去到我呢一代人，保守估計可以活到九十至一百歲；換句話說到八十歲左右，都仍然要繼續有一定經濟價值，否則人生最後嘅廿年會過得好坎坷。
其實我呢代出生成長於 1970 年嘅人，一樣要諗未來三十年嘅生計。所以今集入面先至有感而發咁講：「當下一代以為我哋經濟上對佢哋好束縛，但其實我哋何嘗唔係一樣想尋找發圍嘅自由？」
Share this post