一命二運三風水四積陰德五讀書

相信大家都一定聽過「一命二運三風水四積陰德五讀書」；有人字面咁樣去解，好直接就得出結論話：「只要條命生得正，就乜都唔需要做都可以過好嘅生活。」通常咁講嘅人，無講出口個句說話就係：「所以我為乜要咁勤力？」

一命

呢個世界有啲因素我哋可以控制，有啲唔可以；有啲人一出世就係大富之家，只要唔行差踏錯都可以一世無憂，但亦有富二代、三代可以將家業敗清光。當然，呢啲例子都係少數。但如果睇客觀數據，有家底嘅細路，不論成長嘅環境同日後發展嘅空間都比其他人多。

有位經濟歷史學者 Gregory Clark 做咗一系列研究，嘗試去搵出社會流動性嘅變化。簡單講，佢嘅測試係假設社會隨著發展會有充分流動性，傳統社會精英階層同「低端人口」嘅姓氏，佢哋嘅後代係現代社會晉身專業甚至精英階層嘅機會應該相等。但從數據顯示，就算係好多代之後，過去傳統社會精英階層嘅後人，往往都有更大嘅成就。當然，有人質疑呢個研究方法，而剛才嘅解釋亦係過份嘅簡化；因為佢係推論嘅過程，用咗唔少統計學嘅手段去排除各種可能出現嘅扭曲同誤差。所以，有興趣嘅朋友可以去搵 The Son Also Rises 呢本書去睇，了解佢用嘅方法。從學術角度去睇其他人嘅研究，有時其實係觀摩排除各種可能性嘅推理同手段，多過去睇個結論。不過，對大多數人來講，The Son Also Rises 最具爭議嘅發現同結論，係不論種族、文化甚至乎子女數目，似乎係出身傳統精英家族嘅後人，繼續係社會上有一定嘅優勢。

Gregory Clark 最具爭議嘅推論係，一個人嘅成功，或者都同個人嘅基因有啲關係；亦即係所謂嘅「龍生龍，鳳生鳳」。

講到呢度可能會有人以為，我一係就好贊成呢種睇法，一係就完全否定呢種睇法。但我會話：「咁又點？」

「咁又點？」無錯，就算天生因素有影響，咁都唔代表係完全決定咗我哋每個人嘅未來。有啲人甚至乎一生出來就有缺陷，要比其他人克服更多嘅困難。又或者，有啲人家境好複雜，有啲人又可能比起其他人更平庸，但咁唔代表佢嘅一生從一開始就注定係失敗。真正嘅失敗，係唔肯去面對自己嘅缺點，唔會搵方法去克服自己嘅限制，然後就用一句「整定嘅」去逃避。

「可憐之人必有可惡之處。」呢句說話唔係咁容易明，甚至會畀人覺得涼薄，但事實係世界上有好多人先天條件唔係咁好，但最終都叫做過咗一個無對唔住自己，無對唔住其他人嘅人生，我覺得咁樣已經叫做頂天立地。

又有人會將其他人嘅成功，講到係因為佢係「天才」。其實我唔鍾意讚人哋係天才，覺得抹殺咗人哋後天嘅努力。我唔係話呢個世界無天份嘅差異，但如果一個人某方面與眾不同，佢亦好大機會因此嘅有其他人唔理解嘅煩惱。可能「天才」運動員嘅際遇會好啲，但我認識其他方面真係特出嘅人，多少都有啲孤獨同寂寞。而且呢個世界無完美嘅人，只係有一、兩樣特殊能力嘅人，最終都未必有發揮嘅機會。

所以，天才又點？天才咪一樣要努力。

所以，講到尾，都有一句話係：「好命不如好運。」又或者另一個講法係：「三分命，七分運。」咁究竟乜嘢係運？

二運

運，直觀嘅理解就係我哋身邊發生嘅事；我就會理解成：「時勢。」

我深信係「時勢造英雄」；出現係適當嘅地方，適當嘅時候，比起一個人天生有幾多天賦來得更重要。愛因斯坦如果遲十年出世，相對論就可能由另一個人提出；愛因斯坦之前已經有個叫 Henri Poincaré 奠定相關嘅基礎，甚至乎同愛因斯坦同期有個叫 David Hilbert 嘅數學家，亦都獨立咁得出同愛恩斯坦同樣嘅結論。又或者當年達爾文發表天演進化論嘅同時，有另一個叫 Alfred Russel Wallace 嘅學者，都係得出同樣嘅結論。

類似嘅例子仲有好多。我唔係話愛因斯坦同達爾文只係好彩，但如果佢哋唔係出現係「適當嘅地方，適當嘅時候」，結果歷史一樣會出現相對論、進化論，只不過會由另一個人去成為大眾所崇拜嘅天才。

點樣可以出現係適當嘅時候同地方？好大程度都係出於個人嘅選擇，所以我覺得對任何人最重要嘅自由，就係選擇係邊度生活同做啲乜嘢。大膽啲咁講，如果愛因斯坦遲一百年出世，可能佢一樣會係某啲其他知識嘅範疇有一定嘅成就，但題目唔會係相對論。所以，時勢唔到我哋掌握，但我哋可以決定自己身處嘅環境去選擇自己能力所及做到最重要嘅事。

命同運都係我哋要了解同面對嘅事，古代嘅人求神問卜，畢竟過去嘅知識體系，資訊好有限。但現代人應該可以用現代嘅眼光去了解自己嘅能力同局限，了解世界發生乜嘢事。

三風水

風水就係我哋可以控制嘅客觀環境因素，尤其係一啲微觀嘅因素。

具體嘅生活同工作環境，一定影響到自己嘅生產力。如果一個人有呢方面嘅基本意識，結果生活同工作嘅習慣會有好大嘅分別。好多講「如何改變習慣」嘅書都教，建立習慣嘅第一步，唔係改變自己嘅心態，而係改變自己嘅客觀環境因素。

我自己近年嘅體會係，盡量簡約就一定係最有效、最舒適嘅生活同工作環境。所以我呢幾年盡量斷捨離不必要嘅身外物；慳錢都係其次，更重要係可以畀自己更專心一致。可能我係一個好易分心嘅人，所以就更加唔可以有多餘嘅物件。衫，唔同季節，唔同場合，有幾件替換就夠；最好唔需要諗太多。書，要睇嘅時候先去搵，但有時都會無端端買咗唔睇，反而令自己覺得好似有啲負累。其他奢侈品，就更加係令自己有心理壓力，驚整壞整唔見。

風水，其實好簡單，越少身外之物，環境就越容易控制。

四積陰德

陰德嘅重點，我認為在於一個人嘅做每件事， 係唔係出於善良嘅動機。

出於善良動機去做決定，至少免除咗無謂嘅心理壓力。當然，我亦都覺得，人世間最難聽嘅一句說話就係：「我都係為你好。」我唔係叫大家去求心安理得做善事，而係想講唔好心存惡念，唔好自欺欺人。積陰德係應該好被動；被動到一個地步就係做咗善事連自己都唔知，咁先至叫做陰德。如果係著相咁去做善事，就已經唔係積陰德。

積陰德，對象係自己，目的係為咗令自己成為一個更善良嘅人，呢個係唯一目的，亦係最終目的。

我相信一個自在自信嘅人，首先要問心無愧；能夠做到對得起自己，下意識裡面就唔會覺得同全世界作對。有呢種心態嘅人，先有可能真正咁去廣結善緣，身邊嘅人先可以覺得呢個人值得信任。

人緣同人品，唔只係識得人多，更重要係其他人對呢個人嘅評價。

講到其他人嘅評價，千祈唔好誤會，我唔係叫你去討好其他人；刻意去討好人，人哋多少都會感覺到背後目的，只不過係唔會當面踢爆。

Integrity 呢個字，意思就係表裡如一。

無人會覺得自己係衰人，但有啲人會用各種藉口去開解自己嘅惡意；有啲人會話因為其他人都咁契弟，所以自己要比其他人更加契弟。一旦接受咗呢種觀念，人就會變得虛偽，做好事係為咗畀人讚，做壞事就將責任推到其他人身上，自己嘅道德標準淪亡，就假設全世界都係咁。

有啲人對基督信仰當中「罪人」呢個概念好抗拒，覺得好似傳教嘅人批評自己，但如果對心性有多少了解嘅人就明白，的確無完美嘅人，我哋都一定有軟弱嘅時候，軟弱嘅時候就會出現剛才所講，忘記咗善嘅目標對象首先係自己，然後就不自覺咁變成一個自己最睇唔起嘅人。

救贖，係接受自己雖然唔完美，因為命就只有一條，所以亦可以坦白咁面對自己；雖然時勢唔到自己控制，但我哋仍然可以盡量簡化自己生活，唔好心存惡念。

五讀書

最後，就係讀書。字面理解固然可以，但讀書都只係手段，目的係要學習。

學習，最重要唔係勤力而係動力。

無人識晒世間所有嘅知識，每個人總有唔識嘅事；有啲人會覺得學習好攰，但亦都有啲人會因為見到自己仲有進步嘅空間而見到目標。

學習嘅真正動力，係因為知道自己嘅不足；越係謙卑嘅人，求知慾越強。

謙卑，唔係去否定、貶低自己，唔係無信心；反而係有自知之明嘅人先清楚知道自己識啲乜，唔識啲乜，有乜嘢要去學。

更重要係，就算你條命生得唔夠正，時勢又好紛亂，你亦都改變唔到自己身處嘅環境，無法專注，情緒上又做到寬恕別人放過自己，最後你都仲可以去透過學習去搵出路。

最有效嘅學習，係從經驗累積有用嘅知識。所以，行動以外一定要反省，如果唔係就唔係學習而係撞答案。相反，假如只有讀書（或者睇 YouTube）而冇行動，亦都唔係真正嘅學習；過得一段時間，一切都會忘記，結果亦只係浪費時間。

總結以上嘅反省，首先嘅問題係我哋係唔係能夠面對得到自己，假如連自己對自己都唔了解，好難有進步嘅機會，亦唔會去嘗試學習新事物；甚至對個世界，對其他人都覺得係滿懷敵意，忘記咗自己嘅善良，漸漸變成一個虛偽、表裡不一嘅人，終日都有一股無以名狀嘅心理壓力。為咗填補呢份不安，有人會追求身外物，但係面對控制唔到嘅外在世界，更加容易然感到徬徨不安，尤其係當時勢的確係好紛亂嘅時候，加上呢種心理狀態之下，好容易同自己講，不斷催眠自己，同自己講根本「無選擇」、「係咁㗎喇」，唔會理性去分析，有啲乜嘢因素係可以控制得到，唔會去諗吓自己仲有啲乜嘢出路，最終就算轉換環境，亦都只會覺得自己係被迫。

「一命二運三風水四積陰德五讀書」唔係乜嘢金科玉律，我攞呢五件事做切入點，都只係想搵個大家都聽過嘅講法，等大家更容易有感受同反省。