01，我見有位性格悲觀嘅朋友話：「唔好對人咁好；正所謂升米恩，斗米仇。」意思就係你一旦對某啲人好，佢哋就覺得「老奉」；覺得一切都理所當然，你只要對佢哋稍為無咁好，就立刻恩將仇報。
02，我亦見到有人將呢種泯滅人性嘅行為，講到係某個文化嘅現象。不過，既然英文入面都有 bite the hand that feeds you 呢個講法，即係話不論乜嘢文化，講乜嘢語言，都一樣有人渣。可以分別只係，人渣佔整體人口比例有幾咁高。
03，「人渣」做得出呢我哋一般人難以想像嘅邪惡行為，首先係因為佢哋眼中可以唔當其他人係人。所以，矛盾嘅地方在於：當任何人開始有呢念頭，認為有啲人唔配被視為人類嘅時候，記得要提醒自己，係啲乜嘢令人變成「人渣」。
04，唔叫呢啲人做「人渣」，或者可以改個講法叫：「反社會人格。」但大家千祈唔好誤會，我並唔係話佢哋有病，所以叫大家同情佢哋，又或者接納佢哋。今日我想反而想從解釋被大家知，點解我哋要慶幸自己生於呢個時代。幾百年前，我哋身邊會有更多人渣，而且不論係乜嘢社會階層，都更多人死於非命。過去嘅人命賤過今日嘅人命；「人人生而平等」呢六個字，得來不易。
05，先講吓「反社會人格」。單單嘅憤世嫉俗，滿腔怒火，並非「反社會人格」；我認為，所謂反社會人格，其實係好極端地缺乏自制能力，而且完全缺乏同理心。呢種人係唔會理會其他人有感受，而佢哋嘅每個決定，亦只會受眼前嘅衝動所主宰。有人形容呢種人為禽獸，但正如我剛才所講，當我哋開始覺得有啲人可以唔當佢哋係人咁去看待，其實就係魔鬼響不知不覺之間，將我哋變成我哋最睇唔起，最恐懼，最厭惡嘅人。
06，所以，做人真係好難。難就難在明知情緒係我哋嘅一部份，但要學識唔好畀情緒駕馭。「唔通對人渣都要同佢講人權？」我知一定有人咁樣問，而我嘅答案係：
「我哋有三件事可以做。一，保護自己。二，唔好令自己變成佢哋。三，盡量令呢個社會少啲人渣。」
07，以上嘅一同二，相信大家都會明白。但請容許我補充一點，就係我觀察有反社會人格傾向嘅人，往往都有好獨特嘅吸引力。其實呢一點亦唔難明，因為敢作敢為嘅外表，有時真係會令人覺得好有魅力。但英雄同惡魔嘅最大分別，就係英雄唔想其他人犧牲，而惡魔永遠都係用其他人嘅性命同利益做籌碼。
08，「假如我哋相信人間有捨身為人嘅天使，就唔可以排除有視人命如草芥嘅惡魔。」但好消息係，統計學上天使同惡魔都係光譜兩邊嘅極少數，絕大多數人都係中間嘅平凡人。而作為一個平凡人，我哋只需要做兩件事，就係保護自己，同埋唔好令自己變成惡魔。
09，反社會人格罪犯雖然係變態，但佢哋唔係非理智；佢哋無人性，但一樣會嘗試掩飾罪行。所以，越係少機會畀佢哋搵食，其實佢哋嘅數目亦越少。更正確啲咁講，偷呃拐騙同謀財害命，佢哋會選擇的回報高而代價低嘅罪行。但係當某啲人試過一次犯法而無後果，佢哋就以為自己可以次次都咁好彩。話說呢次轟動全港嘅凶殺案，疑犯全部都有前科。
10，亦有研究發現，反社會人格嘅人，犯罪嘅高峰期係 24 - 44 歲。大家要留意，研究只不過話畀我哋知，更老同更嫩嘅罪犯相對少，但唔代表唔會犯罪。更大可能係，有反社會人格嘅老嘢，竟然仍然可以消遙法外犯案，往往代表個制度好有問題；例如係知法犯法嘅警員。
11，反社會人格有無得醫？反社會人格，既有先天嘅因素，亦有後天嘅環境因素。先天嘅因素，例如缺乏自制能力，呢一點可以透過藥物控制；但你覺得有反社會人格嘅人，會唔會咁有紀律咁自覺去準時食藥呢？至於後天因素，正如剛才所講，盡量減少佢哋可以犯案嘅機會，增加犯案嘅成本，雖然唔可以完全杜絕不幸事件，但可以少一宗，就少一宗。
12，話說回頭，廿一世紀嘅變態反社會行為，可能係幾百年前嘅社會，係相對上普遍嘅情況。以前嘅人，的確可以唔當其他人係人；例如十九世紀之前，世界好多地方都有奴隸制度，有各種酷刑。
13，對於呢個題目有興趣嘅朋友，我第一本諗到嘅書就係 Steven Pinker 嘅 The Better Angels of Our Nature 。早兩年我寫呢本書嘅時候，可能講遠咗少少，但結論仍然係：人嘅善，不外乎三個因素：同理心、自我約束能力同講道理嘅能力。
The Better Angels of Our Nature - by Simon Lee | 利世民 (substack.com)
14，另外我有個觀察就係，絕大多數人見到變態凶手一家，都會覺得佢地喪心病狂。掉返轉頭去諗，即係話，我哋絕大多數人其實都做唔出呢啲行為。唔希望大家唔好以為我係一味咁正能量，但我只係想同各位講，社會上絕大多數人都係有基本嘅同理心，有基本嘅自制能力，同埋可以有講道理嘅基本能力。如果我哋想個社會變得更好，就向呢幾個方向著手，令大家更有同理心，更有自制能力，更會講道理。
15，除咗光譜中間嘅大多數正常人，光譜兩端一邊係好得人驚嘅惡魔，另一邊係可望而不可及嘅英雄。要記住，社會上只有少數人能夠捨身為人。所以，唔好祈望其他人係英雄；明白大多數人都係貪生怕死，亦都有各種人性上嘅缺陷。所以對社會嘅理性嘅預期，係每個人都要盡量保護自己，亦盡量避免自己成為心目中嘅魔鬼。如是者，已經係一個好美滿幸福嘅世界。
16，同理心雖然話係人性，但亦可以間接透過文藝創作去潛移默化。有個講法指，文學、戲劇、攝影、電影、甚至遊戲等，都透過令人加強人嘅想像力而產生更強嘅同理心。甚至有人話，VR 最終嘅理想，係畀我哋第一身咁感受到其他人嘅處境，增強人嘅同理心。但亦有人擔心，打機打得太多會令人對暴力感到麻木。其實呢個題目嘅爭議，一直都有，亦唔會有最終嘅結論。
17，至於自制能力，行為科學對呢方面結論係某程度上係可以學習同訓練。我甚至認為，教育嘅重點，應該係著重個人自制能力，多於係知識嘅傳授。
18，世界永遠都唔會係完美，將來亦肯定會有不幸嘅事情發生。但我哋仍然可以對未來樂觀，亦唔需要放棄對人嘅信念。歷史同統計數字都話畀我哋知，人類文明嘅發展，係越來越少仇殺；社會主流意見，亦越來越唔接受暴力。我哋每日見到新聞好似好多凶案，好多慘案，係因為呢啲事情實在太過有違社會道德倫理，所以先至咁大篇幅報導。
19，「唔係喎，好似美國啲槍擊案，嚴重咗喎⋯⋯」真係，2020 年之後呢兩年的確係，但如果睇統計數字，由 1980 年起，美國主要死於槍械嘅人，原因係自殺。甚至有理由相信，只要有朝一日安樂死合法化，連用槍械自殺嘅個案都會減少。畢竟，人就算失去求生意志，都一樣唔想死得痛苦。
20，所以，最後都係強調多一次，唔需要對人性失去信心；但對自己有適當嘅保護係必須嘅。我哋每個人只要做好自己，避免變成魔鬼，這個世界就已經會好好多。
Share this post