第三次開 Podcast

今次係我第三次開 podcast 。

第一次，應該係一年前，我自己唔係好滿意。第二次，係幾個月前；好少少，但我又嫌個目的唔夠明確。

又或者好似洋人所講，third time is a charm 。今次我嘅打算嘅模式係，大概每兩個星期，就將過去嘅十篇八篇，來一個總結。好處之一係畀我自己有個反省。同時亦都可以方便各位讀者。雖然我唔係刻意要篇篇都寫咁長，但我都知，唔係每個讀者每日都會有時間睇我寫嘅嘢，所以每兩星期一次 round up ，都有佢嘅實際用途。

另一個更重要嘅原因，就係我相信，閱讀同聆聽嘅時候，人有唔同嘅思維模式。

文字係著重邏輯、結構同關係；寫得長唔緊要，反正多數人閱讀嘅時候，都會好自然咁跳過啲自己覺得唔重要嘅部分。換句話說，閱讀係一個主動去尋找資訊嘅過程。

聆聽嘅 state of mind 就好唔同；大多數情況，聆聽都係被動咁接收。當然有所謂嘅 active listening ，但其實多數人聆聽嘅時候，都係更加 intense ；甚至 intense 到一個地步，重點已經唔係你講乜，而係點樣去講。所以，照讀稿，啲人唔會鍾意，語音機械人，啲人亦唔會鍾意；由作者親自去表達，重點係要聽語氣情感。

但係我都覺得要有個框，如果唔係就會講講吓唔知去咗邊。其實我都已經習慣咗，作寫嘅時候腦海有把聲讀畀我自己聽，但到錄音嘅時候，好多時又會講咗第二句。

今次叫做重啟 Podcast 之後嘅第一次錄音，所以個引言長少少。

過去兩個星期，最重要嘅題目，係由個市講到聯繫匯率，再講到應唔應該買（或者賣）樓。

5 月 10 日寫嘅「你今日跌咗幾多？」，副題就講到明「跌咗嘢試吓唔好執」；跌市嘅日子，乜嘢評論都係錯。我見唔少講開股票嘅朋友，呢排都無講股票就知，個氣氛真係好差。至於另一篇 「Crypto 金融風暴 🤧」，我係好肯定咁講，LUNA 之亂同當年亞洲金融風暴泰銖危機，有好多相似嘅地方；甚至目前嘅環境，同當時都有幾分相似。

講到聯繫匯率，有啲嘢就一定要講，就係過去廿幾年來，好多提出話要廢除聯匯嘅理由，都唔成理由。相反，聯匯嘅優點，亦唔單止係穩定嘅匯率。所以我又寫多篇「放棄聯匯的代價 (unsubject.com / patreon )」

講返香港，聯繫匯率嘅存在，就好似一國兩制一樣，對神奇國度唔係一成不變嘅承諾。所以，唔應該變，但唔代表唔會被改變。究竟聯繫匯率嘅最終會係點？同埋因乜嘢原因會被廢呢？我又寫多篇「假如港元真的脫勾 ✂️ 🔗」；呢篇我覺得係近來嘅代表作。因為我都幾肯定，當中有啲睇法，都係第一次同大家分享。

寫完呢三篇，好多朋友叫我再講多啲；所以我就寫多篇「影響力大到超乎想像嘅美元」解釋過去四十幾年來，世界經濟宏觀嘅環境，係點樣受到美聯儲局嘅政策方向所影響。甚至乎好少人留意到，1980 年代嘅後半，其實有好幾件事都係由美元匯率由高位回落引發。後冷戰時代嘅序幕，其實就更加係宏觀經濟嘅現象。呢篇「一國兩幣與闖物價關」，只係一個系列嘅開端，我依家寫緊下集，講吓神奇國度由 1990 年代之後嘅變化。

另外仲有一篇，就係早兩日寫關於買唔買樓，又或者係唔係應該套現，持盈保泰。我嘅答案係，呢個問題並唔可以就咁答，因為答案絕對係因人而異。依家應唔應該買（賣）樓，其實有兩條問題大家可以自己去諗吓，去搵自己嘅答案。

今次 round-up 講住咁多先；其實呢期都有寫其他政治嘅題目，詳細我唔介紹喇，大家有時間又有興趣嘅話，可以自己去睇返。

最後，如果你曾經 sign up 過我嘅任何一個 newsletter ，但近來好似唔見有收到任何嘢，請你試試摷吓個垃圾桶。Spam filter 嘅演算法有時都會錯傷好似我咁嘅良好市民。