湯文亮連自住層樓都要賣？

笑吓就一定㗎喇；但認真咁講，如果睇好後市但嫌個單位太大嘅，放租咪得囉，點解要賣？同埋，如果畀銀行 call loan，就真係唔好周圍同人講；好馨香咩。

講返個市場。其實我聽到消息話湯文亮連自住層樓都放，第一個念頭真係：「唔通個市真係見底？」因為市場有個傳統智慧就係：「連最後一個好友都投降，大概都係見底之時。」

但見底還見底，反彈還反彈，係兩回事。

當年有班人，覺得息口低自己又攞到銀行放數，不斷買買買買買。如是者，個個都唔著泳褲游水。

其實唔止香港地產市場，世界各地甚至唔同嘅經濟範疇，都一樣有類似嘅情況。總之，任何可以做抵押向銀行借錢嘅資產，總會有出現價格泡沫嘅情況；地產如是、股票如是，甚至乎最近兩年連 Nvidia 啲晶片亦如是。

畢菲特話水退時就知邊個無著泳褲，其實重點不在於有冇槓桿，而係借返來嘅錢買咗啲乜。

站在「市場正義」嘅角度，有賺錢嘅機會就自然有蝕錢嘅機會，尤其係長遠而言。每次低潮都係弱肉強食嘅淘汰賽，亦只有經過呢種震盪洗禮，社會先至會進步。