近兩星期好多人都張頭像改成「吉卜力風」，有人覺得好玩，有人覺得唔尊重原作者宮歧駿，亦有人話模仿係對藝術家最崇高嘅致敬。
我自己有學過吓書法，從個人嘅經歷咁講，任何藝術技法嘅初學者，都一定會從模仿大師開始；掌握咗技巧之後，先至漸漸發展出個人風格。又有一個講法係 good artists borrow, great artists steal 。所以，藝術作品有人仿效係好正常不過嘅現象，不過 AI 嘅大量生成又算唔算仿效？又有冇侵害到原作者嘅權益？
法律上嘅版權係有一定限制，尤其係針對大量嘅複製。但風格就未必完全受到法律嘅保障。而退一步從道德層面講，我個人認為係唔係對原作者尊重，真係要睇動機同效果；大多數人生成嘅「吉卜力風」頭像，其實又未去到唔尊重原作者嘅程度。
另外，究竟乜嘢為之藝術？藝術係可以令人引發共鳴嘅一啲事物。所以，咁多人都用不同嘅風格去生成頭像、Meme 圖，其實都反映緊藝術嘅本質。
準備今集嘅時候，我同啟明都有傾過，係唔係可以畀啲有用嘅 tips 各位，所以影片中後段我哋都有講到點樣寫好一個 prompt 。我用嘅框架係 RICE：
Role - 你叫 AI 去扮演一個乜嘢角色（例如：編輯、科學家、評論人、詩人等等）
Instruction - 你想叫 AI 做乜嘢（例如：撮寫一份報告、解釋一個概念、評論一件事、寫一首四言絕詩等等）
Context - 你有乜嘢要求（通常都係要佢必須包括嘅資料，例如：Who、What、Where、When、How 等等），越仔細越好。
Example - 相關參考例子
最後，我通常會加一句：「仲有乜嘢唔明？」
補充一點，用英文同 AI 溝通，出來嘅結果往往係更有文有路；最差嘅係用廣東話，通常都好粗魯。
Share this post