我有個朋友，深信專業人士唔可能被 AI 取代，因為佢覺得：「你點都要搵啲人去負法律責任吖嘛；乜 AI 可以負責㗎咩？」
首先，人類歷史好早就發明咗 legal person （法人）呢個概念，而「法人」係可以負責任嘅；更重要一點就係，好多責任都可以幻化成一個價錢牌。
錢可以解決嘅問題，就唔係問題。
專業責任保險嘅出現，未必解決到道德上責任嘅問題，但肯定處理到法律上同經濟上責任嘅問題。
咁關 Agentic AI 乜事呢？最主要嘅關連係，Agentic AI 理論上可以為人類，亦即係 Principal （我亦做事主）去作出決定。先唔講 AI 去做決定會唔會好過人類（雖然我覺得絕大多數情況都會好過），但做決定就要負責任。
好多人就話：「咁個責任邊個去負？」
表面去睇好似好難去處理，但其實又唔係咁難；類似嘅情況就係一間企業嘅員工做錯事令顧客蒙受損失，咁邊個去負責任？
法律上唔係處理唔到嘅問題。
更重要係，呢啲責任絕對可以買到保險；AI 做決定出錯嘅機會率，一定有數得計。
所以，一心諗住有個牌就唔會被 AI 取代嘅朋友，我勸大家都係諗清楚乜嘢為之責任。
最後都係一直講個句，唔係 AI 取代人類，係識得用 AI 嘅人，取代啲以為自己份工同個專業身份好穩陣嘅人。
Share this post