可能有啲會員發覺，近來我多咗政治同經濟以外嘅題材；原因之前都有講過，就係我想有啲可以即刻畀大家可以帶來價值嘅內容。
當然，市面上有好多人都會教人點樣去發達之類嘅。坦白講，我唔信呢一套；我相信呢度嘅讀者都係水平比較高嘅一群，都唔信一百幾十一個嘅會員費可以買得到啲乜嘢內幕消息。
不過，健康就係一個好卑微但又好重要嘅題目。難得嘅係我搵到 Greg 呢個拍檔一齊去講。
我哋唔係賣啲乜嘢保健產品，唔係叫大家一定要食啲乜就可以延年益壽，而係想大家更了解自己嘅健康狀況。
就正如我久不久講理財，都係叫大家要明白風險；唔係完全去避免風險，而係去了解自己可以承受啲乜嘢風險，幾多風險。
所以我哋嘅建議係：「大家都試吓用 CGM ，睇吓唔同嘅飲食作息習慣，對自己有啲乜嘢影響。」
成個系列，有幾個好重要嘅核心概念：
一，新陳代謝係健康嘅根本；而最影響新陳代謝嘅就係胰島素。
二，碳水化合物會刺激身體分泌胰島素；正常嘅情況無問題，但問題係身體長期處於胰島素偏高嘅情況，就會出現胰島素阻抗，然後就係所謂嘅二型糖尿病。
三，二型糖尿病亦都只係表象，因為胰島素有其他嘅功能；而且由糖尿病引起嘅問題包括：心血管疾病、癌症、腦退化等等。
四，所以，首先要做嘅事，就係畀我哋嘅新陳代謝機能，有一個合理嘅負荷。唔單止係食幾多，亦都關乎點樣食，食啲乜。
五，尤其係女性，人生有幾個特殊階段，內分泌會有好大嘅變化，令到胰島素嘅分泌會有影響。其中一個例子，就係妊娠糖尿病。
六，另外坊間對外啲乜嘢食物先為之健康，亦都存有好多主觀嘅「認知偏差」，例如覺得果汁係純天然就一定好健康，又或者麥皮可以吸膽固醇之類。又或者，有啲食物其實係安全嘅，就畀人以為好唔健康，例如蛋黃。有一點可以肯定，膽固醇唔係食落肚嘅，而大多數血液裡面嘅膽固醇，其實係我哋身體自然分泌嘅。
過去十一集我哋有更加詳細咁去解釋；有會員問我點解無貼上呢度，所以由今集開始，我都會係呢度貼返條片，至於之前嘅集數，就麻煩大家要上返 YouTube，我有個 Playlist 方便大家 👇🏻
Share this post