阿根廷總統 Javier Milei 在 2024 年瑞士 Davos 世界經濟論壇的發言在網上瘋傳（至少在我的圈子是）；其實在某程度上，他是在批評在場的幾乎每個人。
我膽粗粗的將這篇發言譯成廣東話。雖然未必所有人都完全認同裡面的每一個觀點，但相信這裡的朋友多少也應該有點共鳴。
另外，他在中後段花了很多篇幅去講新古典經濟學和市場失效；這個題目恐怕我要另事再解釋了。
事不宜遲，去片 👇🏻
大家好。今日我嚟到呢度，係想通知大家一聲，西方社會正面臨一個重大威脅；呢個威脅嘅起因係，本應保護西方社會價值觀嘅人，已經被另一種價值觀同化咗，繼續落去一定會變成社會主義，結果係貧窮同經濟上嘅剝削。
可惜係，近幾十年來，西方社會主要領袖，有啲出於幫助他人嘅好意，或者係有啲只係想打入特權階層，放棄咗自由，轉而追求各種唔同版本，所謂嘅集體主義。我嚟到呢度係想話畀大家知，集體主義從來都唔係解決問題嘅方法；相反，呢種諗法正正係各種問題嘅最根本嘅成因。
信我，冇人比我哋阿根廷人更適合喺呢兩個問題去做見證。1860年，我哋擁抱自由，35年內我哋成為咗世界上首屈一指嘅經濟力量。而過去一個世紀以來阿根廷擁抱集體主義，我哋見到阿根廷嘅人民點樣有系統咁窮落下，經濟排名插水到世界嘅第140位。但喺我哋繼續討論落去之前，好重要嘅係首先睇吓證據，睇吓點解自由市場資本主義唔單止可以結束全球貧窮，更重要係呢個亦係道德上唯一可取制度。
回顧經濟發展嘅歷史，我哋可以見到由公元零年到大約1800年，全球人均 GDP 基本上係一啲都無增長。從經濟增長嘅圖表，會見到一個所謂「曲棍球棒」嘅形狀，即係有九成嘅時間係一條橫線咁，去到十九世紀先開始急劇上升；當中停滯不前嘅日子，唯一例外，就係十五世紀末發現美洲嘅時間。
當資本主義漸漸被接納，就出現爆炸式嘅財富增長；分析數據就更加會見到，增長嘅速度有增無減。由公元零年至1800年期間，全球人均 GDP 增長率保持每年大約 0.2% 嘅水平，即係基本上冇增長。到咗十九世紀，隨著工業革命，GDP 平均增長率達到每年 0.66%；按呢個速度，全球人均 GDP 倍增嘅時間大約係 107 年。1950 年，全球人均 GDP 平均增長率升到每年 1.66%；我哋唔再需要 107 年去倍增全球人均 GDP，而係 66 年。由 1950 年到 2000 年期間，增長率為每年 2.1 %，意味著喺短短 33 年內，我哋就可以將全球人均 GDP 倍增。
呢個趨勢，唔單止無停落嚟，而且係直到今日仍然繼續緊。睇返由 2000 年到 2023 年嘅時期，全球人均 GDP 嘅增長率再次升到每年 3%，意味我哋只需要 23 年時間就可以將全球人均 GDP 倍增。由 1800 年，即係工業革命，到今日，全球人均 GDP 增加咗超過 15倍，令九成嘅世界人口擺脫貧窮。
有件事我哋永遠都唔應該忘記。直到 1800 年，世界有 95% 嘅人口生活喺極端貧窮中，而去到 2020 年疫情之前，呢個數字下降到 5%；結論顯然易見：自由市場資本主義作為一種經濟體系，非但唔係社會問題嘅根源，而且係我哋唯一嘅工具，可以用來終結全球嘅飢餓、貧窮同困苦。證據確鑿毋庸置疑，自由市場資本主義喺生產方面嘅優越。
左翼教條（Doxa）攻擊資本主義，話資本主義有道德上嘅問題；詆毀話資本主義係不公義。佢哋話資本主義壞，因為係個人主義，而集體主義就係好，因為集體主義係「利他」；所以佢哋要追求社會公義。但係當發達國家近來先至流行呢啲觀念，喺我嘅國家阿根廷，呢啲政治語言已經流行咗超過 80 年。真正嘅問題係，所謂「社會公義」先至係不公義，更無助於社會大眾嘅福祉。所謂「社會公義」本質上先係暴力。政府嘅資源來自稅收，而稅收一定係強制性。試問有邊個人會面不紅氣不喘咁話，群眾係完全出於自願去交稅？以上嘅推論亦意味著，政府只可以通過強迫嘅手段去獲取資源；當稅收負擔愈高，強制性嘅意味就愈強烈，自由亦愈係萎縮。
提倡社會公義嘅人，以為經濟好似一塊可以用唔同方式去分配嘅蛋糕；但係佢哋唔會去諗，呢件蛋糕都要有人去整出來，唔係現成㗎！正如 Israel Kirshner 所講，財富並唔係一個固定嘅概念，而係經過市場發現過程中所形成。如果一間公司提供嘅商品或服務唔受歡迎，佢只有求變去迎合市場需求，如果唔係就只有破產收場；企業要創造高質量嘅產品，用一個好嘅價格，增加產品嘅吸引力，得咗，就生產更多。所以，市場係一個不斷發現嘅過程，喺其中資本家就透過行動去發現正確嘅方向。但係，如果政府懲罰成功嘅資本家，阻礙佢哋去推陳出新，破壞佢嘅尋求利潤嘅動機，結果係，佢哋會生產得更少，個蛋糕會更細，最終招致社會整體嘅損失。集體主義壓抑市場發現嘅過程，唔畀資本家攞返自己應得嘅利益，其實等於縛住企業家雙手，唔畀佢哋佢哋用更好嘅價格，生產更好嘅商品，去提供更好嘅服務。
既然資本主義呢種經濟體系，唔單止令全球九成人擺脫極端貧窮，而且速度越來越快，與此同時又公平，同道德上亦更加優越；咁樣嘅話，點解學界、國際組織、政治經濟嘅理論家，會群起攻之，要將呢種經濟體系妖魔化？
多得資本主義，世界正處於最好嘅時刻；歷史上從未出現過比我哋今日所生活嘅時代更加繁榮境況。今日嘅世界，比以往任何時候都更自由、更富裕、更和平同更繁榮。對所有人來講都係咁，尤其係個啲尊重經濟自由同個人財產權嘅自由國家；平均來講，自由嘅國家比專制嘅國家更加富裕，兩者之差有十二倍咁多。
自由國家嘅人民生活，好過專制政權之下嘅九成人。用一般嘅標準去衡量，自由國家嘅貧窮人口比例係專制嘅國家嘅 1/25；如果用嚴格嘅標準，自由國家嘅貧窮人口比例更只有專制嘅國家嘅 1/50 。但如果咁都唔夠說服力嘅，我畀多個數據就係，自由國家嘅人民，平均壽命比專制國家嘅人民長 25%。
假如要知道我哋捍衛緊啲乜嘢，重要嘅係要搞清楚我哋講自由主義係乜嘢意思。我借用阿根廷史上最有影響力嘅自由主義嘅倡導者，Alberto Bengas Lynch 教授嘅講法；佢認為，自由主義係基於唔侵害他人嘅原則，尊重其他人嘅人生目標，捍衛每個人對自己生命、自由同財產權嘅權利，制度上嘅展現就係私有財產、政府唔干預嘅自由市場、自由競爭、分工同社會合作，只有透過用更好嘅價格，提供更好質量嘅商品同服務畀其他人，先至可以成功。
換句話講，資本家、成功嘅企業家，對整個社會嘅福祉有所貢獻。簡單嚟講，一個成功嘅企業家係一個英雄。呢個就係我哋希望阿根廷未來會接納嘅模式；一個建基於自由主義原則嘅模式，捍衛生命、自由同財產。
但既然自由市場資本主義一直係全球根除貧窮咁有用嘅工具，而我哋而家又正處於人類歷史上最美好嘅時光，點解我仲要話呢個係西方社會嘅危機？
不同嘅政治同經濟既得利益者，由於佢哋對理論嘅錯誤，以及對權力嘅野心，一直破壞自由，並且為社會主義中門大開，結果好可能係將我哋置於貧窮、悲慘同停滯當中。無論係乜嘢時間地點，社會主義總係帶來貧窮，失敗。所有嘗試社會主義嘅國家，經濟上係失敗，社會上失敗，文化上亦失敗，更加殺死咗超過一億人。
西方社會今日嘅主要問題係，我哋唔單止要對抗個啲即使現實擺在眼前都仲係要信社會主義嘅人，仲有嗰啲領袖、思想家同學者；佢哋用扭曲嘅理論為自己做擋箭牌，繼續去破壞呢個賦予我哋史上最大財富同繁榮嘅經濟體系。
我所指嘅理論框架，就係新古典經濟學理論；呢套理論有意無意之下，令到社會主義進一步蔓延，令社會退化。
新古典主義嘅問題在於，由於佢哋迷信嘅模型同現實脫節，然後佢哋班信徒就將概念上錯誤，講到係所謂嘅「市場失效」。佢哋唔去睇吓自己構想出來嘅模型有啲乜嘢問題，反而走去諗點樣用規管去糾正「市場失效」，而呢啲規管令市場價格更多扭曲，更偏離現實，影響經濟計算，影響埋儲蓄、投資同發展嘅決定。問題嘅根本源於，呢班所謂嘅經濟學家其實都唔係好了解市場係咩；因為如果理解乜嘢係市場運作，就會秒速明白唔 可能有佢哋口中嘅「市場失效」。
市場，不單係圖表上嘅供應曲線同需求曲線。市場係一個社會合作機制，喺其中嘅人自願交易，互通有無。如果用呢個定義，市場失敗根本係一個自相矛盾嘅語言偽術；只要交易係你情我願，就唔係「市場失效」。唯一可能出現「市場失效」嘅情況係，就係有人被迫，而社會裡面唯一具有普遍強制能力嘅，就係政府。
所以，如果有人話自己搵到「市場失效」嘅證據，我會建議佢哋睇下，當中有冇搵到政府干預嘅痕跡。如果冇發現政府干預嘅痕跡，建議重新由頭睇一次，定義上呢結論係不合邏輯，因為「市場失效」根本唔存在。
新古典主義者好鍾意引用所謂「市場失效」嘅例子，其中一個係市場力量集中少數企業嘅情況。但係如果冇呢個經濟規模效益遞增嘅現象，我哋亦唔可能見到自 1800 年到今天嘅經濟增長現象。
由 1800 年開始，全球人口增加咗八、九倍，人均收入增長了超過十五倍；貧窮人口比例由 95% ，降到5%。經濟規模效益遞增，亦意味會有市場集中結構嘅出現，有啲人會叫呢種現象做「壟斷」；但呢種帶來咁多好處嘅事，點解按照新古典經濟理論，會被認為係「市場失效」嘅？
喂，各位新古典經濟學派嘅朋友，係時候要跳出你哋嘅框架思考喇。當你哋迷信嘅模型失效，就唔好對現實發脾氣，試吓對你哋啲模型發脾氣，睇吓可唔可以改變佢哋？新古典經濟學模型嘅困境源於，佢哋呢班人試圖針對所謂「市場失效」去提升市場運作，咁做唔單止為社會主義中門大開，而且長遠仲會破壞經濟增長。例如，規管壟斷，拆散佢哋嘅利潤，削減佢哋嘅經濟規模效益，最終一定會降低經濟增長。換句話說，每次佢哋想糾正一個根本唔存在嘅「市場失效」，無論係因為佢哋唔瞭解市場，定係因為佢哋太過沉迷自己構想嘅完美市場模型，其實佢哋都係為社會主義鋪路，帶領人民走向貧窮。
就算理論證明政府干預有害無益，就算證據又實證埋政府干預會失敗收場，集體主義嘅信徒都唔會認為人民應該有更多自由，相反佢哋會諗出更多嘅規管，令情況變得更糾結，出現惡性循環，直到我哋全部人都窮到無得再窮，要依賴呢班坐喺豪華辦公室嘅官僚階級。
集體主義有幾唔得就係人都見到，自由世界有幾進步亦毋庸置疑，所以社會主義信徒亦都改變咗佢哋嘅綱領；佢哋放棄咗階級鬥爭，取而代之係其他嘅所謂矛盾，呢啲新嘅綱領，對社會同經濟增長，一樣咁有殺傷力。
佢哋第一條戰線，就係好荒謬，好唔自然咁，要男人同女人鬥爭。其實自由主義已經確立咗性別之間嘅平等；我哋所信嘅原則，就係建基於人人生而平等，每個人都被造物者賦予嘅同樣不可剝奪嘅權利，包括生命、自由同財產。但激進嘅女權主義嘅綱領，要政府干預增加，阻礙咗經濟運作。不論係啲乜嘢婦女事務委員會，又或者專責呢個議題嘅國際組織，除咗為官僚提供就業機會，對社會完全冇任何貢獻。
社會主義信徒提出嘅另一個矛盾，就係人類同大自然。佢哋主張，因為人類對地球造成傷害，所以必須不惜一切代價保護地球，甚至主張控制人口，或甚支持墮胎。可惜，呢啲毒害咁深嘅觀念，已經深深滲透到社會。呢新馬克思主義信徒，成功地同化咗西方社會嘅常識；佢哋透過佔據媒體、文化、大學，甚至國際組織；尤其係最後一環嘅情況非常嚴重，因為呢啲國際組織對對各國嘅政治同經濟決策，有重大影響。
好彩係，喺呢啲多邊組織裡面，越來越多人敢於提出自己嘅聲音；因為如果我哋唔再直接正面咁去抗衡呢啲觀念，唯一可能嘅終局就係更多大政府、更多規管、更多社會主義、更多貧窮、更少自由，因而生活質素嘅下跌。
但不幸嘅係，西方社會已經踏上咗社會主義呢條道路。對好多人嚟講，話西方社會擁抱社會主義，聽落真係不可思議；因為傳統定義裡面嘅社會主義係一種經濟體系，當中嘅生產資源由國家同政府所擁有、支配；從呢個觀點去睇，話西方社會擁抱社會主義，真係有啲荒謬。
不過，喺我睇嚟，社會主義嘅定義有必要更新，以反映當前嘅情況。
從今日嘅環境來睇，政府唔需要控制生產嘅各種資源，都可以控制我哋每個人每日生活上嘅每一個方面。透過發行貨幣、用補貼債務、控制利率、控制價格再加上各種以糾正所謂「市場失效」嘅規管工具，政府可以控制數以億計嘅人類命運。我哋已經淪落到一個點，就喺大部分西方社會，政治上已經接受咗某種集體主義，無論佢哋自稱做共產主義、法西斯主義、納粹主義、社會主義、社會民主主義、國家社會主義、基督教民主主義、凱因斯主義、新凱因斯主義、進步主義、民粹主義、民族主義甚至全球主義，最後都冇實質分別。每個人覺得政府應該控制個人生活嘅每一方面；所有人都覺得自己個套諗法，一定會好得過兩百年來帶領人類社會發展嘅資本主義。
我今日嚟到呢度，係要邀請西方各國重拾通往繁榮嘅道路。經濟自由、制約政府同對私有財產嘅絕對尊重，對經濟增長至關重要。集體主義產生造成嘅貧困，唔係幻想，但亦唔係宿命。呢個係阿根廷人過去最少一百年來面對嘅現實，因為我哋行過呢條路。正如之前所講，自從我哋決定放棄令我哋富裕嘅自由原則，阿根廷就陷入咗一個下行嘅惡性循環，每天都變得更窮。呢個係我哋嘅親身經歷，所以先至要嚟呢度同警告大家，如果西方社會背棄呢一條曾經令人民富裕嘅自由之道，將會發生嘅事情就係走上奴役之路。阿根廷嘅歷史話畀我哋知，如果政府窒礙市場自由運作、窒礙自由競爭、窒礙價格嘅自由調節，無論一個國家表面上有幾多財富、自然資源、人口、能力、教育水平，又或者係中央銀行金庫裡嘅金條數量等等，最終都一定唔會成功。如果貿易受阻，如果私有財產受到攻剝削，唯一嘅結局就係貧窮。
總結嚟講，我想向所有在場嘅企業家，以及無論喺唔喺現場全世界各地睇緊我哋嘅人講，千祈唔好被政治階層或者個啲靠國家餵養嘅寄生蟲嚇倒；唔好向個啲只想延長自己權力同保留自己特權嘅政治階級屈服。你哋先至係社會恩人，你哋係英雄。你哋係我哋所經歷緊呢個人類歷史最輝煌時代嘅創造者。千祈唔好畀人話有野心就係不道德；如果你賺錢，係因為你為消費者用好嘅價格，提供咗更好嘅產品，促進咗社會福祉。唔好畀國進民退發生，政府並唔係解決問題嘅方案，政府本身先至係問題嘅根源。你哋係呢個故事嘅主角，從今日起，你哋有阿根廷作為無條件嘅盟友。
非常感謝你哋，自由萬歲。多謝。
Share this post