【是日隨筆】 被政治耽誤了的創業家

黎老闆真正嘅信念，係自由市場。

大家見我唔講單官司，梗係有原因嘅。一來，報道大家都會去睇，我亦冇嘢補充。二來，單案仍然審緊就唔方便亦唔應該太多評論。

歷史自有公論。

但呢幾年我覺得好似過得好快，但又好似發生好多事，轉變好大。我指嘅唔只係香港，而真係個世界。諗返幾年前自己嘅工作，當時嘅世界，同依家嘅工作，依家嘅世界，真係好似兩個世界。究竟係個世界變得越來越快？定係我哋設身處地嘅感覺太真實？回想起廿年前、三十年前，世界亦都變得好快。可能，世界從來都變得咁快，無快過，亦無慢到。

歷史，亦充滿令人意想不到嘅變化。

唔講單案，只係講我認識嘅老闆兼師傅黎智英。我可以大膽講，佢係個被政治耽誤嘅創業家；佢嘅興趣首先係食，其次係做生意，我同佢打工咁多年，95% 嘅交流係講生意同科技，有時會講吓同事嘅八卦嘢（佢份人都真係幾八卦），另外多數就係啲九唔搭八嘅吹水嘢，好少講政治，十隻手指數得晒。