【是日隨筆】齊來消費李嘉誠

講嘢要揀場合．迴音谷．流量密碼

Echo chamber 呢個現象，真係人性；群眾就硬係鍾意聽啲主流嘢。

阿周小姐都講到咁白。誠哥洞燭先機神機妙算之類嘅，我就無謂再重複，增加迴音谷嘅聲量喇。

當然，我都知，李嘉誠呢三個字絕對係流量密碼。我亦都明，點解咁多人好雀躍。地產黨對政府不滿喎，甚至係對北京不滿喎，「講出我心底話」喎。

我明；我真係明。

但我都係想畀多個角度大家參考下，所以好唔識趣咁去 FB 留咗句：

「周凱旋消費誠哥，真係有一手；比起阿楷有過之而無不及。至於阿鉅繼承咗成個長和系，就梗係唔駛消費。而故事嘅教訓係，資本主義嘅終極，一個想像都可以值好很多億，睇你識唔識玩。」

真心，我唔係批判資本主義；識我嘅都知，我係好擁抱資本主義。更唔係串周凱旋；我真心覺得佢識玩；學到嘢。

點知，有條友跳出來講：「應該說的重點不應該是這些⋯沒有營養。」

Sorry…