非法入境者

呢個題目，恐怕會係 YouTube 上面畀人話我左膠。

但問題係，以我親身住緊嘅地方，其實對非法入境者又唔係咁抗拒。最主要原因，係我呢區根本唔夠人做啲粗重功夫。

其實美國好多地方都有類似嘅情況。

講到尾，最大問題係美國無輸入外勞嘅計劃。

想將工業帶返美國？不如先問吓點解美國嘅工資咁高；又或者點解呢啲非法入境者嘅人工可以咁平？

可能會有人認為，犯法就係犯法。但我想講嘅係，現實就係現實。現實就係，當你又要墨西哥啲工廠搬去美國，但你又將啲勞動力趕出美國，兩件事本身就係矛盾。

「加人工咪請到人囉。」我都預咗會有人咁講。

問題係你呢頭加人工，產品會唔會加價呢？產品加價，最終又係邊個負擔呢？又係唔係負擔得起呢？

我只係想講，有咁嘅社會現象，有咁嘅市場結構，唔係其他國家嘅人剝削緊你美國，而係美國政府令到美國嘅低技術人口「高不成低不就」。

唔去解決呢個根本問題，反而去賴「一日最衰都係外國」，咁同小粉紅真係無分別。

我唔係話無問題；我只係話呢個政府提出嘅方法解決唔到問題。如果咁都畀人話係「左膠」，我都無話可說。